Венгриянинг энг йирик банкларидан бири — OTP Bank Ўзбекистондаги «Ипотека банк»ни сотиб олиш бўйича жараённи қайта бошлади. Бу ҳақда Венгрия банкининг молиявий директори Ласло Бенчик маълум қилди.
Биз жараённи қайта бошладик, яна бир тасдиқловчи текширувдан ўтмоқдамиз. Келишувни амалга ошириш эҳтимоли юқори деб ўйлаймиз, — дейди OTP Bank молиявий директори.
Унинг таъкидланишича, «Ипотека банк»да инвестициялар учун жозибадорлик ўсган. Йил бошидан бери «Ипотека банк» 750 млрд сўмга яқин соф фойда олган.
Венгрия бош вазири Виктор Орбан ҳам Самарқандда бўлиб ўтган Туркий Давлатлар Ташкилоти саммити олдидан мазкур жараён ҳақида гапириб ўтганди.
Биз Ўзбекистон президенти ва ҳукумати билан бизнес имкониятларини муҳокама қилдик. ОТПга яқинда муҳим ўзбек банкини сотиб олишини эълон қилиш имконини берувчи келишувга яқинмиз», — дейди Орбан.
Венгриянинг OTP Bank’и «Ипотека банк»ни хусусийлаштиришда иштирок этиши 2021 йилнинг кузида маълум бўлган эди. Шартнома 2022 йил бошида имзоланиш кутилган эди. Кейинчалик банк сотиб олиш жараёнини кечиктиришга қарор қилганди.
OTP Group — молиявий, суғурта, инвестиция ва банк бизнеси соҳаларида активларни бошқариш ва лизингдан пенсияни молиялаштиришгача бўлган Венгрия банк гуруҳи. Бу Марказий ва Шарқий Европадаги асосий молиявий хизматлар провайдерларидан биридир. Венгриядаги энг йирик банк бўлган OTP Bank гуруҳнинг асосини ташкил қилади.
Изоҳ (0)