Ukraina hukumati harbiy harakatlar sharoitida mamlakat Qurolli kuchlari va iqtisodiga yordam berishdan bosh tortgan kompaniyalarni davlat nazoratiga o‘tkazmoqchi. Bu haqda Ukraina Energetika vazirligi rahbari German Galushenko Financial Times nashriga ma’lum qildi.
“Biz omon qolishimiz kerak, bu hamma uchun umumiy vazifa. Agar davlat kimdir alohida o‘yin o‘ynashga urinayotganini ko‘rsa va bu Rossiyadan himoyalanish maqsadiga zid bo‘lsa, bunga qandaydir choralar ko‘rilishiga aminman”, — dedi vazir.
U Kiyev kompaniyalarni moliyaviy jihatdan yaxshilash niyatida ekanini qayd etib, bunday chora-tadbirlarning natijalari tez ko‘rinishiga umid bildirdi.
Galushenko Ukraina hukumatining chora-tadbirlarini milliylashtirish deb atashdan bosh tortdi va kompaniyalarning davlat nazorati ostiga o‘tkazilishi vaqtinchalik hamda urush davri iqtisodiyoti uchun mo‘ljallanganini ta’kidladi. U biznes egalari o‘z mol-mulkini qaytarib olishiga yoki ularga kompensatsiya to‘lanishiga va’da berdi.
Sentabr oyida Ukraina prezidenti Vladimir Zelenskiy Ukraina harbiy-sanoat kompleksi uchun zarur uskunalarni, shuningdek, “vaqtinchalik bosib olinish xavfi mavjud” hududda joylashgan mulklarni davlat nazoratiga o‘tkazishga ruxsat beruvchi tuzatishlarni ma’qullagan edi. Qonun harbiy holat yoki favqulodda holat sharoitida amal qiladi.
Izoh (0)