Словениядаги президент сайловларида партиясиз номзод, 54 ёшли юрист ва ҳуқуқ ҳимоячиси Наташа Пирц-Мусар ғолиб чиқиб, мамлакатда давлат раҳбари лавозимидаги илк аёл кишига айланди, деб ёзади «РБК».
Бюллетенларнинг 99,99 фоизи ҳисоблаб чиқилганидан кейин маълум бўлишича, унга сайловчиларнинг 53,86 фоизи овоз берган. Унинг рақиби — собиқ ташқи ишлар вазири Анже Логар ўз мағлубиятини тан олди, у 46,14 фоиз овозни қўлга киритган.
Пирц-Мусар «ҳамма учун президент бўлиш»га, демократия ва инсон ҳуқуқларини ҳимоя қилишга ваъда берди, шунингдек, иқлим ўзгаришлари аҳамиятини қайд этди. У Словенияни кексалар таъминланадиган ва тингланадиган, ёшлар эса қолишни хоҳлайдиган мамлакатга айлантириш истагини билдирди.
Наташа Пирц-Мусар АҚШ собиқ президенти Дональд Трампнинг рафиқаси — Мелания Трампнинг адвокати бўлган, хусусан Словениянинг Suzy нашри у ҳақда мақола чиқарганидан кейин ушбу мамлакатда унинг манфаатларига вакиллик қилган. Мақолада АҚШ собиқ биринчи хоними 90 йилларда Нью-Йоркда Паоло Замполли модель агентлигида ишлагани, у эса «бадавлат мижозлар учун эскорт агентлик сифатида фаолият юритгани» ҳақида ёзганди.
Бундан ташқари, Эдвард Сноуден томонидан Евроиттифоқ фуқаролари маълумотлари қонунга зид равишда ишлатилаётгани фош қилинганидан кейин, Пирц-Мусар АҚШ билан музокаралар олиб борган Евроиттифоқ делегацияси аъзоси бўлган.
Россия махсус операцияси бошланганидан кейин, Словения Евроиттифоқнинг бошқа мамлакатлари қаторида Украинани қўллаб-қувватлаган. Словения собиқ бош вазири Янез Янша март ойида Киевда Украина президенти Владимир Зеленский билан кўришган. Учрашувда Польша ва Чехия бош вазирлари ҳам қатнашган. Уларнинг ташрифидан мақсади мамлакатни қўллаб-қувватлаш учун кенг чора-тадбирлар пакетини тақдим этишдан иборат бўлган.
Изоҳ (0)