AQSH Milliy razvedka kengashi hisobotida aytilishicha, Birlashgan Arab Amirliklari (BAA) uzoq vaqtdan beri AQSH tashqi siyosatini qulay yo‘nalishga burishga urinib kelgan. Bu haqda hujjat bilan tanishgan uch manbaga tayanib, Washington Post gazetasi yozmoqda.
Maxfiy hisobotda Qo‘shma Shtatlarning siyosiy tizimini manipulyatsiya qilishga urinishlar tafsilotlari ko‘rsatilgan. Hujjatda AQSH tashqi siyosatini BAA uchun maqbul yo‘nalishga yo‘naltirishning qonuniy va noqonuniy yo‘llari sanab o‘tilgan. Hisobotda tasvirlangan bir qator operatsiyalar josuslikka o‘xshaydi, deb yozadi gazeta.
Masalan, BAA dissidentlar va siyosatchilar ustidan josuslik qilish, AQSHdagi kompyuterlarni buzishga yordam berish va xakerlik texnologiyasini taqdim etish uchun AQSH razvedkasining uch sobiq xodimini yollagan, deyiladi xabarda.
Vashington Post gazetasining ta’kidlashicha, Amirliklar lobbichilar uchun 154 million dollardan ko‘proq mablag‘ sarflagan, BAA manfaatlari uchun siyosiy hujjatlarni ishlab chiqqan tashkilotlarni qo‘llab-quvvatlashga esa yuzlab million sarflagan.
Milliy razvedka kengashi — AQSH razvedka hamjamiyatining asosiy tahlil markazi. U milliy xavfsizlik masalalarini aniqlash uchun 18 ta milliy razvedka agentligi ma’lumotlariga tayanadi.
Izoh (0)