14-noyabr kuni Oliy Majlis Qonunchilik palatasining navbatdagi majlisida bo‘lib o‘tdi. Unda deputatlar tomonidan “O‘zbekiston Respublikasi bilan Qirg‘iziston Respublikasi o‘rtasida o‘zbek-qirg‘iz Davlat chegarasining alohida uchastkalari to‘g‘risidagi shartnomani ratifikatsiya qilish haqida”gi hamda “O‘zbekiston Respublikasi Hukumati bilan Qirg‘iziston Respublikasi Vazirlar Mahkamasi o‘rtasida Andijon (Kampirobod) suv omborining suv resurslarini birgalikda boshqarish to‘g‘risidagi bitimni ratifikatsiya qilish haqida”gi qonun loyihalari muhokama qilindi.
Majlis davomida deputat Nosirjon Aminov G‘ovasoy soyi Chust tumanining yer maydonlarini sug‘orish hamda aholini ichimlik suvi bilan ta’minlashga xizmat qilishini ta’kidlab, Davlat chegarasining belgilanishi natijasida kelgusida G‘ovasoydan keladigan suvdan foydalanish bo‘yicha hukumat tomonidan qanday choralar ko‘rilayotgani bo‘yicha izoh so‘radi.
Ushbu savolga Bosh vazir Abdulla Aripov javob qaytardi. Uning qayd etishicha, ikki davlat o‘rtasida tuzilgan shartnomada Qirg‘iziston Respublikasi “G‘ovasoy” daryosining tabiiy oqimiga to‘sqinlik qiladigan hech bir gidrotexnik va boshqa inshootlarni qurmaslik, shuningdek, “G‘ovasoy” daryosi suvining texnik ifloslanishiga yul qo‘ymaslik majburiyatini olishi belgilanganini ma’lum qildi.
Deputatlarning ta’kidlashicha, ushbu hujjatlarning qabul qilinishi O‘zbekiston bilan Qirg‘iziston davlatlari o‘rtasidagi o‘zaro manfaatli hamkorlik aloqalarini rivojlantirishga, o‘zbek-qirg‘iz davlat chegarasini belgilash borasidagi masalalar to‘liq o‘z yechimini topishga xizmat qiladi. Shuningdek, mamlakatlarning savdo, sarmoyaviy, sanoat kooperatsiyasi, energetika, transport, qishloq va suv xo‘jaligi, qurilish, ekologiya, turizm, madaniy-gumanitar sohalarda mavjud ulkan salohiyatdan foydalanish imkonini beradi.
Muhokamalardan so‘ng deputatlar qonun loyihalarini ma’qulladi.
Izoh (0)