Telegram’dagi “Davletovuz” kanalida aholidan elektr va gaz ta’minotidagi uzilishlar bo‘yicha so‘rov e’lon qilingach, jurnalist Aziza Qurbonova o‘zining Facebook sahifasiga Uchtepa tumanida gaz bosimi juda pasayib ketganini bildirgan holda rasm joylagandi. Tuman hokimligi esa postga izoh yozib, jurnalistga uning o‘zi tumanga qanday foydasi teggani haqida savol berdi.
Jurnalist yuqoridagi rasmga “Salom, mening nomim — gaz. Lekin bunga shubham bor. Kuchim faqat miltillashga yetadi. 20 minutdan beri choy ham qaynatolmayman. Egalarim o‘tmishim — o‘choqqa qaytishgan. Ha, shunaqa. Manzilim — Uchtepa tumani Cho‘ponota mahallasi” deya izoh qoldirgan edi.
“Uchtepa tumani hokimligi” nomi ostidagi profil esa ushbu post ostida munosabat bildirgan.
Bo‘ldi-da, Azizaxon, nima qilasiz olovga yog‘ sepib? Hamma narsa nazoratga olingan. Qani, bir kun kelib Uchtepada ishlang-chi, ko‘raman. Bas qiling xalq g‘azabini qo‘zg‘atishni. Siz nima qilib berdingiz Uchtepaga? Tepada o‘tirib, aqllilik qilish nechog‘lik oson-a? Men ham siz o‘tirgan joyda anchagina o‘tirganman, lekin bunaqangi kattalik qilib, birovning g‘azabini keltirmaganman, Allohga shukur.Mening ismim — Uchtepa tumani hokimligi va men xalqimning og‘ir va yengil kunlarida ham birga bo‘lib, ular nafas olayotgan havodan nafas olaman, ular yurgan yo‘llardan yuraman, ularning dardi bilan yashayman. Mana men kimman, Azizabonu. Va sizga ham shuni tavsiya qilaman. O‘zingizdan kattalarga hurmat bilan yondashishni tavsiya qilaman, — deyilgan unda.
Bu orada “Davletovuz” so‘rovnoma natijalari bilan bo‘lishib, kanal orqali o‘tkazilgan so‘rovnomada ham qariyb 60 ming kishi ovoz bergani, ularning 84 fozi (!) gaz va elektr energiyasi muammosiga duch kelayotganini ma’lum qilgani haqida yozgan.
“Kommunikatsiya kerak” sarlavhali postda ijtimoiy tarmoqlarning asosiy mavzusi — har soatda o‘chayotgan elektr energiyasi, soatlab sovuqda o‘tirgan odamlar, kilometrlik navbatda turgan haydovchilar, hatto shaharlarda pasayib ketgan gaz bosimi bo‘layotgani haqida so‘z borgan.
Lekin na Energetika vazirligi, na hukumatning boshqa mas’ullari xalqqa nima bo‘layotganini to‘g‘ri va sodda qilib tushuntirolyapti, qanaqadir tushunarsiz bayonotlar, tushunarsiz nosozliklar haqida gapirilyapti, lekin hech kim hech narsani tushunmayapti. Qahrga to‘la savollar havoda muallaq turibdi: nega, nega aynan hozir va nega shu holatga kelib qoldi? May oyidan kuz-qishga tayyorgarlik haqida gapiriladi-yu, lekin hali qish kelmasdan, tuzukroq qor yog‘masdan butun mamlakat taqdir hukmiga tashlab qo‘yilmoqda?Aziza Qurbonova o‘z postiga tuman hokimligi bildirgan munosabatdan so‘ng “Davletovuz”ning yuqorida yozganlariga ishora qilib, “Kommunikatsiya so‘raganmidinglar? Mana u”, deya hokimlik izohlaridan skrinshot e’lon qildi va quyidagicha fikr qoldirdi.Xalq bilan sifatli kommunikatsiya kerak. Xalq dardiga kimgadir foydali payti quloq tutish kerak emas, balki har kuni, har soatda manzilli gapirilmas ekan, xalqning davlatga ishonchini, agar qolgan bo‘lsa, borini ham yo‘qotish mumkin. Energetika tizimi dabdalasi chiqqan bo‘lsa — gapirilsin, kim dabdala qilgan bo‘lsa — jazosini olsin. Xalq bilsin, nega bunday bo‘layotganini. Odamlarni o‘z dardi bilan yolg‘iz qoldirishning badali qimmat bo‘ladi, — deyilgandi xabarda.
Tepadagi postimga Uchtepa tumani hokimligining Feysbukdagi akkaunti shunday javob beribdi. Ko‘p ehtimol bilan bu matbuot xizmati boshlig‘ining gaplari. “To‘rabek To‘rayev?” degan savolimga javob ham bermadi va inkor ham etmadi. Klassik javob berilgan-a, nima dedingiz? Yashasin, “noliyverma, sen o‘zing davlatga nima qilib qo‘yding” klishesi.Avvalroq Energetika vazirligi elektr va gaz ta’minotidagi muammolarni to‘g‘ri tushunishga chaqirgan edi. Unda, xususan, kunlar keskin soviy boshlagandan so‘ng iste’molchilarning elektr energiyasi va gazga bo‘lgan talabi ham ortib borayotgani, shuningdek, sovuq kunlarda magistral gaz quvurlari va tarmoqlarida tabiiy gaz bosimining ham keskin pasayishi kuzatilayotganini ma’lum qilingan.Yashasin, axborot xizmatining saviyasi.
Yashasin, xalqining og‘ir va yengil kunlarida birga shu havodan nafas olgan va olayotgan, qachondir tepada (qaysi tepaligiga aniqlik kiritilmagan) ishlaganida birovni g‘azablantirmagan va “aq(i)llilik” qilmagan Uchtepa tumani hokimligi akkaunti.
Yashasin, olovga (qani o‘sha olov? 2 soatdan beri teftel sho‘rvam qaynamaydi) yog‘ sepadigan va o‘zi tumanga hech narsa qilib bermagan, kattalarni hurmat qilmaydigan, Uchtepa tumani hokimligi akkaunti avval o‘tirib ko‘rgan tepada o‘tiradigan (qaysi tepa ekan, borardim o‘shatga) g‘alamis Azizabonu. Mana o‘zbekcha crisis communication va public relations’dan mahorat darsi. O‘rganinglar. Esiz, — deb yozadi jurnalist.
Fursatdan foydalanib, iste’molchilardan ushbu vaziyatni to‘g‘ri tushunishlarini so‘ragan holda, tarmoqlarda yuzaga kelishi mumkin bo‘lgan yirik avariyalarni oldini olish hamda energiya resurslari barqarorligini ta’minlash maqsadida, imkon qadar ushbu resurslardan tejamkorlik bilan foydalanishlarini eslatib o‘tamiz, — deyilgandi xabarda.Mavzuga doir:
- “Har kuni elektr energiyasini tejash kunini nishonlayapmiz”. Namanganliklar Energetika vazirligidan hafsalasi pir bo‘lganini aytmoqda (video)
- O‘zbekiston energotizimida og‘ir oqibatli “avariya” – blekaut xavfi borligi ma’lum qilindi
- “Bu hali holvasi bo‘lishi mumkin” – o‘zbekistonliklar elektr va gaz ta’minotidagi uzilishlar oqibatidan xavotirda
Izoh (0)