14 ноябрь куни Олий Мажлис Қонунчилик палатасининг навбатдаги мажлисида бўлиб ўтди. Унда депутатлар томонидан «Ўзбекистон Республикаси билан Қирғизистон Республикаси ўртасида ўзбек-қирғиз Давлат чегарасининг алоҳида участкалари тўғрисидаги шартномани ратификация қилиш ҳақида»ги ҳамда «Ўзбекистон Республикаси Ҳукумати билан Қирғизистон Республикаси Вазирлар Маҳкамаси ўртасида Андижон (Кампиробод) сув омборининг сув ресурсларини биргаликда бошқариш тўғрисидаги битимни ратификация қилиш ҳақида»ги қонун лойиҳалари муҳокама қилинди.
Мажлис давомида депутат Носиржон Аминов Ғовасой сойи Чуст туманининг ер майдонларини суғориш ҳамда аҳолини ичимлик суви билан таъминлашга хизмат қилишини таъкидлаб, Давлат чегарасининг белгиланиши натижасида келгусида Ғовасойдан келадиган сувдан фойдаланиш бўйича ҳукумат томонидан қандай чоралар кўрилаётгани бўйича изоҳ сўради.
Ушбу саволга Бош вазир Абдулла Арипов жавоб қайтарди. Унинг қайд этишича, икки давлат ўртасида тузилган шартномада Қирғизистон Республикаси «Ғовасой» дарёсининг табиий оқимига тўсқинлик қиладиган ҳеч бир гидротехник ва бошқа иншоотларни қурмаслик, шунингдек, «Ғовасой» дарёси сувининг техник ифлосланишига юл қўймаслик мажбуриятини олиши белгиланганини маълум қилди.
Депутатларнинг таъкидлашича, ушбу ҳужжатларнинг қабул қилиниши Ўзбекистон билан Қирғизистон давлатлари ўртасидаги ўзаро манфаатли ҳамкорлик алоқаларини ривожлантиришга, ўзбек-қирғиз давлат чегарасини белгилаш борасидаги масалалар тўлиқ ўз ечимини топишга хизмат қилади. Шунингдек, мамлакатларнинг савдо, сармоявий, саноат кооперацияси, энергетика, транспорт, қишлоқ ва сув хўжалиги, қурилиш, экология, туризм, маданий-гуманитар соҳаларда мавжуд улкан салоҳиятдан фойдаланиш имконини беради.
Муҳокамалардан сўнг депутатлар қонун лойиҳаларини маъқуллади.
Изоҳ (0)