Kiyev va Vashington Ukraina hududida kichik modulli reaktor qurishni rejalashtirmoqda. Bu haqda Ukrainaning AQSHdagi elchisi Oksana Markarova ma’lum qildi.
“Bugun BMTning iqlim bo‘yicha 27-konferensiyasi doirasida AQSH prezidentining iqlim bo‘yicha maxsus vakili Jon Kerri va Ukraina energetika vaziri German Galushenko Ukrainada kichik modulli reaktor qurish bo‘yicha tajriba loyihasi boshlanganini e’lon qildi”, — deb yozdi u o‘zining Facebook sahifasida.
Markarovaning so‘zlariga ko‘ra, loyiha ishtirokchilari AQSHning Argon milliy laboratoriyasi xalqaro konsorsiumi, Ukrainaning “Energoatom” kompaniyasi, Ukraina Milliy xavfsizlik va mudofaa kengashi hamda Ukraina Yadro va radiatsiyaviy xavfsizlik davlat ilmiy-texnika markazi bo‘ladi. Boshqa xususiy sheriklar qatoriga Clark Seed, Doosan Enerbility, FuelCell Energy, IHI Corporation, JGC Corporation, Samsung C&T Corporation va Starfire Energy kompaniyalari kiradi.
Kichik modulli reaktorlar atom elektr stansiyalariga o‘rnatiladigan reaktorlardan nisbatan kichik va kuchsizroq bo‘ladi. Kichik modulli reaktorlarning afzalligi shundaki, ularni bir joydan ikkinchi joyga ko‘chirish va odatiy AES uchun mos bo‘lmagan joylarga o‘rnatish mumkin.
Izoh (0)