Qirg‘iziston prezidenti Sadir Japarov ijtimoiy tarmoqlardan birida jiyani (ukasining qizi) sakkizinchi bor haydovchilik guvohnomasi olish uchun imtihon topshirishga tayyorlanayotgani haqida yozdi. Bu haqda Sputnik xabar berdi.
Japarov mazkur tizimni nazorat qiluvchi “Unaa” davlat muassasasi faoliyati uning shaxsiy nazorati ostidaligini aytdi va asosiy e‘tibor haydovchilik guvohnomasini berish tartibiga qaratilishi zarurligini ta’kidladi. Prezident haydovchilik guvohnomasini sotib olish mumkinligi va ayrim mansabdor shaxslar, ayniqsa, huquq-tartibot idoralarida ishlayotganlar o‘z yaqinlariga “prava” olib berishi hech kimga sir emasligini eslatdi.
Shuningdek, Qirg‘iziston rahbari turli korrupsion sxemalar tuzib, davlat xizmatini daromad manbai sifatida ko‘rayotganlar borligini ta’kidladi. Jiyani haqida to‘xtalar ekan, Japarov uning sakkizinchi marta “prava” olishga urinishini to‘g‘ri va tahsinga loyiq deb atadi. Mamlakat fuqarolarini bu boradagi “chiriyotgan tizim”ni bartaraf etishga hissa qo‘shishga chaqirdi. Prezident ba’zi odamlar kompyuter imtihonidan o‘tishni chetlab o‘tayotgani, Jaloloboddagi imtihonda durbindan foydalanilganini ta’kidladi.
“Pul yoki yaqinlaringiz orqali haydovchilik guvohnomasini olish mumkin emas. Bunday urinishlar bo‘lsa, choralar ko‘riladi, — deb va’da berdi u.
Japarovning xulosasiga ko‘ra, haydovchilarning yo‘l harakati qoidalarini yaxshi bilishi tufayli yo‘llardagi baxtsiz hodisalar va o‘limlar soni kamayadi.
Eslatib o‘tamiz, 2021-yilda Qirg‘izistonda prezident korteji ishtirokida yo‘l-transport hodisasi sodir bo‘lgandi va avariyada Sadir Japarovning shifokori halok bo‘lgandi.
Izoh (0)