Vazirliklar rahbarlarining tadbirkorlar bilan muloqotda bo‘lishlari biznes muhitini yaxshilashda muhim ahamiyatga ega. Bu haqda tadbirkor Hikmat Abdurahmonov Samarqanddagi iqtisodiy forum doirasida “Daryo” muxbiriga bergan intervyusida aytib o‘tdi.
Hikmat Abdurahmonovning ta’kidlashicha, vazirlik va idoralar nafaqat tadbirkorlar bilan, balki o‘zaro yaxshi muloqotda bo‘lishi zarur.
O‘zbekistonda biznes boshlaganimizga 17 yil bo‘ldi. Hozirgi kunlar besh yoki o‘n yil avvalgi davr bilan taqqoslaganda ancha yaxshi. Fikrimizni erkin ayta olyapmiz, soliqlarimizni to‘g‘ri to‘layapmiz. Hukumatdagilar bizga quloq solayotganini, e’tibor berilayotganini sezyapmiz.Avvalroq mazkur forumda Jahon banki vitse prezidenti Anna Berde O‘zbekiston Markaziy Osiyoda eng tez o‘sayotgan mamlakat ekanini aytgandi.Albatta, investitsiyalar bir yoki ikki yilga emas, 10-20 yilga qarab tikiladi. Shuning uchun bizlardagi muhim savol, davlatning boshlagan yo‘li oxirigacha shunday davomli ketadimi.
Misol uchun, xususiylashtirish masalasida. Bu juda katta savol. Hozir O‘zbekiston rivojlanayotgan mamlakatlar bilan raqobatda. Investorlar ham taqqoslaydi, O‘zbekistondagi biznes muhitga baho beradi va shundan kelib chiqib investitsiya qilish masalasini ko‘rib chiqadi.
Oxirgi 3-4 yilda vazirlik va idoralar soni avvalgidan ancha ko‘paydi. Ularning nafaqat biznes bilan, balki bir-biri bilan bo‘ladigan muloqoti ham biz uchun juda muhim. Bu biznes iqlimni yaxshilashga yordam beradigan jarayon. Ular bizdan, biz esa ulardan qo‘rqishimiz kerak emas. Chunki mexanizm birgalikda ishlaydi. Bu yil meni xursand qilgani forumda vazirlar chiqib, muloqot qilayotgani bo‘ldi. Ularning zamon bilan hamnafas ravishda xalqaro hamkorlar bilan ingliz tilida suhbatlashayotgani ham quvonarli.
Ha, hali ham ba’zi rahbarlar hijolat bo‘lmoqda. Ayrimlari til bilmaydi. Lekin muhimi ular bahs-munozara va muloqot qilishni boshlagani shaxsan men uchun muhim o‘zgarish. Albatta, ularni notiq, kuchli spikerlarga aylanishini hech kim kutayotgani yo‘q. Eslasak, ilgari intervyu berishga yoki bu forumdagi kabi katta maydonlarda gapirishga ham qo‘rqilardi. Hozir bu narsa o‘zgaryapti.
Hikmat Abdurahmonov, tadbirkor.
Izoh (0)