«Илгари вазирлар интервью беришга ҳам қўрқарди» — тадбиркор Ҳикмат Абдураҳмонов

Вазирликлар раҳбарларининг тадбиркорлар билан мулоқотда бўлишлари бизнес муҳитини яхшилашда муҳим аҳамиятга эга. Бу ҳақда тадбиркор Ҳикмат Абдураҳмонов Самарқанддаги иқтисодий форум доирасида «Дарё» мухбирига берган интервьюсида айтиб ўтди.

Ҳикмат Абдураҳмоновнинг таъкидлашича, вазирлик ва идоралар нафақат тадбиркорлар билан, балки ўзаро яхши мулоқотда бўлиши зарур.

Ўзбекистонда бизнес бошлаганимизга 17 йил бўлди. Ҳозирги кунлар беш ёки ўн йил аввалги давр билан таққослаганда анча яхши. Фикримизни эркин айта оляпмиз, солиқларимизни тўғри тўлаяпмиз. Ҳукуматдагилар бизга қулоқ солаётганини, эътибор берилаётганини сезяпмиз.

Албатта, инвестициялар бир ёки икки йилга эмас, 10-20 йилга қараб тикилади. Шунинг учун бизлардаги муҳим савол, давлатнинг бошлаган йўли охиригача шундай давомли кетадими.

Мисол учун, хусусийлаштириш масаласида. Бу жуда катта савол. Ҳозир Ўзбекистон ривожланаётган мамлакатлар билан рақобатда. Инвесторлар ҳам таққослайди, Ўзбекистондаги бизнес муҳитга баҳо беради ва шундан келиб чиқиб инвестиция қилиш масаласини кўриб чиқади.

Охирги 3-4 йилда вазирлик ва идоралар сони аввалгидан анча кўпайди. Уларнинг нафақат бизнес билан, балки бир-бири билан бўладиган мулоқоти ҳам биз учун жуда муҳим. Бу бизнес иқлимни яхшилашга ёрдам берадиган жараён. Улар биздан, биз эса улардан қўрқишимиз керак эмас. Чунки механизм биргаликда ишлайди. Бу йил мени хурсанд қилгани форумда вазирлар чиқиб, мулоқот қилаётгани бўлди. Уларнинг замон билан ҳамнафас равишда халқаро ҳамкорлар билан инглиз тилида суҳбатлашаётгани ҳам қувонарли.

Ҳа, ҳали ҳам баъзи раҳбарлар ҳижолат бўлмоқда. Айримлари тил билмайди. Лекин муҳими улар баҳс-мунозара ва мулоқот қилишни бошлагани шахсан мен учун муҳим ўзгариш. Албатта, уларни нотиқ, кучли спикерларга айланишини ҳеч ким кутаётгани йўқ. Эсласак, илгари интервью беришга ёки бу форумдаги каби катта майдонларда гапиришга ҳам қўрқиларди. Ҳозир бу нарса ўзгаряпти.

Ҳикмат Абдураҳмонов, тадбиркор.