AOKAda o‘tkazilgan brifingda Oliy Majlis Inson huquqlari bo‘yicha vakili (ombudsman) axborot xizmati rahbari Fotima Madrahimova Ombudsman tomonidan qiynoqlarning oldini olish bo‘yicha Milliy preventiv mexanizm doirasida amalga oshirilgan monitoring tashriflari haqida ma’lumot berdi.
Qayd etilishicha, 9 oyda ombudsman nomiga ruhiy, psixologik, jismoniy yoki boshqacha tarzda bosim o‘tkazilgani masalasida 143 ta shikoyat kelib tushgan.
Ombudsman va uning huzuridagi Jamoatchilik guruhlari tomonidan harakatlanish erkinligi cheklangan shaxslar saqlanadigan joylarga 297 ta monitoring tashrifi amalga oshirilgan. Tashriflarda harakatlanish erkinligi cheklangan shaxslar saqlanadigan joylarda ushlab turilgan 4500 dan ortiq shaxs bilan jamoaviy va 2605 nafar shaxs bilan yakka tartibda suhbatlar o‘tkazilgan.
2022-yilning 9 oyida ombudsmanga harakatlanish erkinligi cheklangan shaxslar saqlanadigan joylarda saqlanayotgan shaxslar, ularning yaqin qarindoshlari va advokatlaridan 2 476 ta murojaat kelib tushgan. Murojaatlarning 582 tasida sud hukmidan, 443 tasida surishtiruv va dastlabki tergov harakatlaridan shikoyat qilingan.
Ichki ishlar vazirligi va mas’ul idoralar tomonidan ushbu shikoyatlarga ko‘ra o‘tkazilgan xizmat tekshiruvlari yakunlariga ko‘ra, 11 nafar xodimga nisbatan intizomiy ta’sir choralari qo‘llanilgan va 1 nafar xodim bilan mehnat shartnomasi bekor qilingan. Prokuratura tomonidan o‘tkazilgan o‘rganishlarga ko‘ra, 1 ta shikoyat bo‘yicha 1 nafar mahkumga qo‘llanilgan intizomiy ta’sir chorasi noqonuniy deb topilgan va bekor qilingan.
Shuningdek, ushbu shikoyatlardan 1 tasi yuzasidan ichki ishlar organlarining 1 nafar xodimi Jinoyat kodeksining 104-moddasi 1-qismi (qasddan badanga og‘ir shikast yetkazish) va 2301-moddasi 1-qismida (dalillarni soxtalashtirish) nazarda tutilgan jinoyatni sodir etganlikda aybdor deb topilib, unga nisbatan 5 yil 6 oyga ozodlikdan mahrum qilish jazosi tayinlangan.
Izoh (0)