Farg‘onada 2,5 mlrd so‘m qarzini to‘lamagan fuqaroning 3 ta MAN yuk mashinasi olib qo‘yildi

Farg‘ona viloyati Buvayda tumanida qarzini to‘lamagan qarzdorning 3 dona yuk mashinasi xatlandi. Bu haqda Majburiy ijro byurosi xabar qildi.

Qayd etilishicha, byuroning Buvayda tumani bo‘limi ish yurituvida bo‘lgan Qo‘qon tumanlararo iqtisodiy sudining 30-maydagi ijro hujjatiga asosan qarzdor R.T.T. MCHJdan undiruvchi ATB “Agrobank” Buvayda tuman filiali foydasiga qariyb 2,5 milliard so‘m kredit qarzini undirish belgilangan.

Davlat ijrochisi tomonidan qarzdorga sud qarorini ijrosini ta’minlash yuzasidan ixtiyoriy muddat berilgan.

Qarzdor ixtiyoriy muddat ichida sud qarorini ijrosini ta’minlash chorasini ko‘rmagani bois qarzdorga tegishli bo‘lgan 3 dona MAN TGX 18440 avtotransport vositasi 10-noyabr kuni aniqlanib, xatlangan va jarima maydoniga olib kirilgan.

Hozirda ushbu xatlangan mulkni auksion savdolarga qo‘yish choralari ko‘rilmoqda.