АОКАда ўтказилган брифингда Олий Мажлис Инсон ҳуқуқлари бўйича вакили (омбудсман) ахборот хизмати раҳбари Фотима Мадраҳимова Омбудсман томонидан қийноқларнинг олдини олиш бўйича Миллий превентив механизм доирасида амалга оширилган мониторинг ташрифлари ҳақида маълумот берди.
Қайд этилишича, 9 ойда омбудсман номига руҳий, психологик, жисмоний ёки бошқача тарзда босим ўтказилгани масаласида 143 та шикоят келиб тушган.
Омбудсман ва унинг ҳузуридаги Жамоатчилик гуруҳлари томонидан ҳаракатланиш эркинлиги чекланган шахслар сақланадиган жойларга 297 та мониторинг ташрифи амалга оширилган. Ташрифларда ҳаракатланиш эркинлиги чекланган шахслар сақланадиган жойларда ушлаб турилган 4500 дан ортиқ шахс билан жамоавий ва 2605 нафар шахс билан якка тартибда суҳбатлар ўтказилган.
2022 йилнинг 9 ойида омбудсманга ҳаракатланиш эркинлиги чекланган шахслар сақланадиган жойларда сақланаётган шахслар, уларнинг яқин қариндошлари ва адвокатларидан 2 476 та мурожаат келиб тушган. Мурожаатларнинг 582 тасида суд ҳукмидан, 443 тасида суриштирув ва дастлабки тергов ҳаракатларидан шикоят қилинган.
Ички ишлар вазирлиги ва масъул идоралар томонидан ушбу шикоятларга кўра ўтказилган хизмат текширувлари якунларига кўра, 11 нафар ходимга нисбатан интизомий таъсир чоралари қўлланилган ва 1 нафар ходим билан меҳнат шартномаси бекор қилинган. Прокуратура томонидан ўтказилган ўрганишларга кўра, 1 та шикоят бўйича 1 нафар маҳкумга қўлланилган интизомий таъсир чораси ноқонуний деб топилган ва бекор қилинган.
Шунингдек, ушбу шикоятлардан 1 таси юзасидан ички ишлар органларининг 1 нафар ходими Жиноят кодексининг 104-моддаси 1-қисми (қасддан баданга оғир шикаст етказиш) ва 2301-моддаси 1-қисмида (далилларни сохталаштириш) назарда тутилган жиноятни содир этганликда айбдор деб топилиб, унга нисбатан 5 йил 6 ойга озодликдан маҳрум қилиш жазоси тайинланган.
Изоҳ (0)