АҚШнинг Microsoft компанияси Россия ҳарбий разведкасига алоқадор хакерларни октябр ойида Украина ва Польшадаги транспорт ҳамда логистика ташкилотларининг тўлов дастурига кибер ҳужум қилишда айблади. Бу ҳақда компания вакилига таяниб, CNN хабар берди.
Маълум қилинишича, жавобгарлик Россия Бош разведка бошқармаси билан алоқадорлиги айтилаётган Sandworm (Iridium) хакерлар гуруҳи зиммасига юклатилди. Бу гуруҳ киберҳужумлар учун номаълум бўлган Prestige тўлов дастуридан фойдаланган. У ҳужумга учраган компьютер тизимидаги барча файлларни сканердан ўтказиб, .txt, .png, gpg ва 200 дан ортиқ бошқа кенгайтмали файллар таркибини шифрлаган.
Microsoft дастлаб ҳужумга DEV-0960 деб номланган номаълум гуруҳ алоқадорлигини эълон қилганди, аммо янги баёнотида ҳужумлар ортида Sandworm (Iridium) турганини қайд этди.
Киберҳужумга учраган ташкилотларни қандай хавф кутмоқда?
Prestige дастури ёрдамида хакерлар аллақачон ҳужумга учраган ташкилотларнинг тармоқларини назоратга олди. 11 октябрь куни хакерлар Prestige’ни барча вирусли қурилмаларга жойлаштирганди, дея таъкидлади CNN манбаси. Бу эса Украинага гуманитар ёки ҳарбий ёрдамни тўғридан-тўғри этказиб берадиган ёки ташийдиган ташкилотлар учун хавф ортиб бораётганидан далолат беради.
10 октябрь куни АҚШдаги энг йирик аэропортларнинг баъзиларига россиялик хакерлар ҳужум уюштирганди. Илк киберҳужумлар Нью-Йоркдаги Ла-Гуардия аэропортига нисбатан амалга оширилган. Кейинроқ мутахассислар Лос-Анжелес халқаро аэропорти ва Чикагодаги o’Хара халқаро аэропорти сайтларида ҳам носозликларни қайд этган.
CNN телеканали қайд этишича, 14 та аэропортлар сайтларининг ишдан чиқишига Killnet хакерлар гуруҳи сабабчидир. Унинг асосчиси Килл Милк ўзини Россиянинг қонунга риоя қиладиган фуқароси деб атади ва гуруҳнинг асосий мақсади «душманга муносиб жавоб бериш ва ер юзидаги тинчлик»дан иборат эканини айтди.
Изоҳ (0)