Qashqadaryo viloyatining turizm rivojlangan qishloqlarida xitoyliklar tomonidan osma dor yo‘llar quriladi. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
Yig‘ilishda Kitob tumanining Qaynar, Shahrisabzning Miraki va Qamashi tumanining Maydanak hududida zamonaviy osma dor yo‘llarini barpo etish, viloyat hududida zamonaviy agrologistika markazlarini qurish, “Qarshi” erkin iqtisodiy zonasi hududida kompaniyaning investitsiya loyihalarini amalga oshirish, “Chiroqchi” erkin iqtisodiy zonasi hududida “yashil energetika”ga o‘tish va energiya tejovchi texnologiyalar bo‘yicha investitsiya loyihalarini amalga oshirish kabi masalalar muhokama qilindi, — deydi Ahror Sodiqov.
Qashqadaryo viloyatining joylashuvi, tabiati va turistik salohiyatini inobatga olib, ikki hafta muddatda kompaniya mutaxassislaridan iborat delegatsiya viloyatga tashrif buyurib, osma dor yo‘llarini qurish bo‘yicha hududning salohiyati hamda imkoniyatlarini o‘rganishi ta’kidlandi. Agar Xitoy kompaniyasi tomonidan mazkur loyihalarni qurishga investitsiya kiritish istagi bildiriladigan bo‘lsa, mahalliy hokimlik tomonidan turizmni rivojlantirish maqsadida infrastruktura obyektlari (yo‘l, elektr, gaz) tayyor holda topshirilishi to‘g‘risida ham fikr bildirildi, — deydi Ahror Sodiqov.
Qashqadaryo viloyat hokimi tomonidan Xitoy investitsiyalari ishtirokidagi qo‘shma va xorijiy korxonalar 38 tani tashkil qilishi, davlatlar o‘rtasidagi ijobiy savdo-iqtisodiy aloqalardan kelib chiqib ushbu raqamni ikki baravarga oshirish imkoniyati mavjudligi ta’kidlangan.
Shuningdek, uchrashuvda Xitoy tomoni energetika, qishloq xo‘jaligi va sanoat mahsulotlari ishlab chiqarish yo‘nalishida qo‘shimcha uchrashuv tashkil qilish va hamkorlik istiqbollarini yana-da kengroq tahlil qilish bo‘yicha kelishuvga erishilgan.
Izoh (0)