Qamashidagi homilador ayollarni olib o‘tib bo‘lmaydigan jin ko‘prik 7,5 mlrd so‘mga qayta qurilib, foydalanishga topshirildi
Qashqadaryo viloyati Qamashi tumanidagi homiladorlarni tug‘ruqxonaga yetkazish uchun daryodan zambilda olib o‘tiladigan, jin ko‘prikdan yiqilganlar esa nogiron bo‘lib qolayotgan Kaltatoy qishlog‘i haqida xabar qilingandi. “Daryo” muxbiri qishloqdagi jin ko‘prik qayta qurilib, foydalanishga topshirilganini ma’lum qildi.
Qayd etilishicha, yangi ko‘prik 7 milliard 532 million so‘mga qayta qurilib, foydalanishga topshirilgan. “Sektor rahbarlari, oqsoqollar va mahalliy aholi vakillari ishtirokida ushbu ko‘prikning rasmiy ochilish marosimi o‘tkazildi va aholining uzoq yillik orzusi ro‘yobga chiqdi”, — deydi Qamashi tuman hokimligi axborot xizmati rahbari Nurbek Rasulov.
Ma’lum bo‘lishicha, “Dovud” mahalla fuqarolar yig‘ini hududida joylashgan, mahalliy aholi tomonidan qurilgan osma ko‘prikdan avval 20 ming nafarga yaqin fuqaro foydalangan.
“Yog‘ingarchilik davrida daryodan o‘tishda qiyinchiliklar kuzatilardi. Ushbu hududda zamonaviy ko‘prik barpo etilishi qishloq ahlining uzoq yillik orzusi bo‘lib kelgan. Davlatimiz rahbarining 2020-yil viloyatga tashrifidan so‘ng ushbu muammoga yechim topildi. Ko‘prik qurilishi uchun mablag‘ ajratildi”, — degan hokimlik vakili.
Ta’kidlanishicha, ko‘prik “Surxondaryo xushvaqtli Angor” xususiy korxonasi tomonidan uzunligi 108 va eni 9 metr o‘lchamda qurilgan.
Eslatib o‘tamiz, 2021-yilning yanvarida Qamashidagi Kaltatoy qishlog‘i aholisining muammosi ijobiy yechim topishi, homilador ayollarni olib o‘tib bo‘lmaydigan jin ko‘prik 5,4 milliard so‘mga qayta qurilishi xabar qilingandi.
