Vodiydagi shifoxonalarda “svet” o‘chib qolayotgani haqidagi xabarga oydinlik kiritildi

Ijtimoiy tarmoqlarda 9-noyabr kuni “Vodiydagi shifoxonalarda ham ‘svet’ o‘chib qolmoqda” mazmunida xabar e’lon qilingandi. Energetika vazirligi ushbu holat yuzasidan munosabat bildirib, elektr energiyasi uzluksizligini ta’minlash maqsadida barcha shifoxonalarda qo‘shimcha dizel generatorlari o‘rnatilganini ma’lum qildi.

Ta’kidlanishicha, 9-noyabr kuni soat 19:47 dan 20:00 ga qadar (13 daqiqa) Namangan viloyat Yuqumli kasalliklar va soat 20:25 dan 20:45 ga qadar (20 daqiqa) Chust tumani markaziy shifoxonalarini elektr energiyasi bilan ta’minlovchi tarmoqlarda nosozlik yuzaga kelib, uzilish kuzatilgan.

Shu vaqt oralig‘ida qisqa fursatda shifoxonalarning zaxira dizel generatorlari ishga tushirilib, muassasalarda elektr ta’minoti qayta tiklangan. Sog‘liqni saqlash vazirligi tomonidan barcha shifoxonalar qo‘shimcha dizel generatorlari bilan ta’minlangan bo‘lib, tibbiyot muassasalariga elektr ta’minoti barqaror yetkazib berilmoqda.

Mavzuga doir: Farg‘ona vodiysida elektr bilan bog‘liq muammolar kuzatilyapti. Vazirlik buni “havo keskin sovib ketgani” bilan izohladi