Ijtimoiy tarmoqlarda Toshkent viloyatidagi Oybek bojxona-chegara postida korrupsiyaga yo‘l qo‘yilayotgani, tovarlar eksportida va O‘zbekistonga xorijiy valyutalarni olib kirishda cheklovlar borligi to‘g‘risida video tarqaldi. Davlat bojxona qo‘mitasi mazkur videoda ko‘tarilgan masalalar yuzasidan Bekobod shahri va tumani tadbirkorlari hamda OAV vakillari bilan ochiq muloqot o‘tkazdi, deya xabar bermoqda “Daryo” muxbiri.
Yig‘ilish davomida videoda tadbirkorlar mutlaqo dalil-isbotsiz gaplar aytgani, aslida ularning ayrimlari bojxona-chegara postlarida noqonuniy xatti-harakatlar qilgani ta’kidlandi.
Davlat bojxona qo‘mitasi raisining birinchi o‘rinbosari Ilhom Muxtorov videodagi gaplar tuhmatligini aytdi.O‘zbekistondan olib chiqish taqiqlanmagan tovarlarni deklaratsiyalash yo‘li bilan olib chiqinglar. Bunga hech qanaqa taqiq yo‘q. Ijtimoiy tarmoqda bojxonani butun xalqning oldida sharmanda qilishga urinish noto‘g‘ri. Bu bilan hech kim baraka topmaydi. Respublikada bojxona qonunchiligi ta’minlanadi. Videoda ikkita odamning yuzini o‘girtirib, bojxonachilar pora oladi, degan gapni ayttirgan. Bu tuhmat.
Suhbat davomida O‘zbekistonga xorijiy valyutalarni olib kirishda to‘siqlar borligi haqida aytilgan gaplar ham asossiz ekani, bunday taqiqlar mavjud emasligi ta’kidlandi.
“Mazkur post orqali respublikaga o‘tgan 10 oy ichida 340 million AQSH dollari miqdoridagi xorijiy valyuta 5 ming 217 ta holatda olib kirilgan. Shuning 76 foizi, ya’ni 260 million dollari 30 nafar fuqaro tomonidan chegaradan olib o‘tilgan. Masalan, bir ayol shu davrda 211-marta, ya’ni har kuni kirib-chiqib, 31 million dollar mablag‘ olib o‘tgan. O‘zbekiston Respublikasiga valyuta olib kirishda cheklov mavjud emas”, – dedi qo‘mita boshqarmasi boshlig‘i Ulug‘bek Tojiyev.
Davlat bojxona qo‘mitasi boshqarmasi boshlig‘i Farhod Olimjonov ayrim tadbirkorlar eksport uchun yaratilgan qulay sharoitlarni suiiste’mol qilmoqda.
Videoda chiqish qilgan tadbirkorlar Tojikistonda boj to‘lovlarini kam to‘lash maqsadida aslida transport vositasiga ortilgan tovarlarni kamaytirgan holda olib chiqishni, deklaratsiyalashni bojxona idoralaridan so‘ramoqda. Bu mutlaqo noto‘g‘ri so‘rov. Biz rasmiy ravishda, muhr bilan tasdiqlab berayotgan deklaratsiyamizda nima tovar ko‘rsatgan bo‘lsak, o‘sha tovarni chiqarishga kafolat va majburiyat olamiz. Agar deklaratsiyada ko‘rsatilgan tovarlar chiqmasa, Tojikiston bojxona idoralari bizga ishonmay qo‘yadi. Buning ortidan O‘zbekistondan har bir chiqayotgan mahsulotni to‘liq tekshiruv tizimiga o‘tadi. To‘rtta tadbirkor ortidan 6 mingta eksportchimizni qiynab qo‘yamiz.Muloqot yakunlangach, holatni o‘rganish maqsadida jurnalistlar Toshkent viloyati “Oybek” bojxona-chegara postida bo‘ldi. Postdan O‘zbekistonga o‘tayotgan o‘nlab tadbirkorlar bilan suhbatlashildi. Ularning aytishlaricha, postdan o‘tishda hech qanday muammolar yo‘q. Korrupsion holatlarga ham duch kelinmagan.
“Hozir Qozog‘istondan Tojikiston orqali chigit olib kelyapmiz. Chegaradan o‘tish oson. Pora olmaydi bu yerdagilar. Pul olsa, hammani qamab qo‘yishadi-ku. Hujjatlar asosida o‘tamiz. Ko‘p kutib ham qolmaymiz”, – deydi 30 yildan beri haydovchilik qilayotgan G‘ulom Isoqov.
Davlat bojxona qo‘mitasi axborot xizmati rahbari (v.b.) Husan Tangriyev videoda intervyu berganlar orasida jinoyat ishi qo‘zg‘atilgan tadbirkorlar ham borligini aytdi.
“Tizimni obro‘sizlantirishlariga shunchaki tomoshabin bo‘lib tura olmaymiz. Bu yerda kecha-yu kunduz vijdonan ishlayotgan xodimlarning sha’ni va ishchanlik kayfiyati turibdi. O‘sha materialni tayyorlagan bloger ham taklif qilingandi, lekin muloqotga kelmadi. Ular bilan qo‘mita rahbariyati uchrashib, qayerda noxolislik bo‘lgani borasida vaziyatni tushuntirdi. Jinoyat ishlari qo‘zg‘atilgan holatlar ham bor. Shu ishlar yakunlangach, bu holat yuzasidan qat’iy bir xulosamizni aytamiz”, – dedi qo‘mita vakili.
Izoh (0)