Ekologiya qo‘mitasi raisi Narzullo Oblomurodovning aytishicha, prezident boshchiligida mamlakatda amalga oshirilayotgan “Yashil makon” umummilliy loyihasi endi Turkiy davlatlar tashkiloti darajasiga ham tashabbus sifatida olib chiqilmoqda.
Xususan, 11-noyabr kuni Turkiy davlatlar tashkiloti Samarqand sammiti doirasida tashkilotga a’zo va kuzatuvchi maqomidagi mamlakatlar davlat rahbarlari ishtirokida Registon maydonida ko‘chat ekish tadbiri o‘tkazilishi rejalashtirilgan.
Shuningdek, Turkiy davlatlar tashkilotiga a’zo bo‘lgan Turkiya, Ozarbayjon, Qozog‘iston, Qirg‘iziston hamda kuzatuvchi maqomiga ega bo‘lgan Vengriya va Turkmaniston davlatlari poytaxtlarida ham bir vaqtning o‘zida ko‘chat ekish tadbirlari uyushtiriladi. Xususan, Ozarbayjonda 11-noyabr kuni 111 ming 111 ta daraxt ko‘chati o‘tqazilishi rejalashtirilmoqda.
“Yashil makon” umummilliy loyihasi doirasida yiliga 200 million daraxt va buta ko‘chatlari ekiladi. Bu orqali shahar hamda tuman markazlarida yashil maydonlar 8 foizdan 30 foizga yetkaziladi. O‘zbekistondagi 10 mingga yaqin mahallalarda mavsum davomida, ya’ni 40 kun mobaynida 75 millionta ko‘chat ekiladi.
Bu bir kunda 1 million 875 mingta ko‘chat o‘tqaziladi degani. Ya’ni har bir mahallaga bir kunda o‘rtacha 7 500 tadan nihol ekiladi. 9-noyabr holatiga ko‘ra respublika hududida 24 milliondan ortiq ko‘chat ekildi.
Izoh (0)