Amnesty International tashkiloti Rossiya qo‘shinlari Ukrainada bosib olingan hududlardan tinch aholini majburan ko‘chirgani va deportatsiya qilgani bo‘yicha hisobot e’lon qildi.
Hisobot “Bosqichma-bosqich” deya nomlanib, Ukrainadagi tinch aholi Rossiya nazorat ostidagi hududlarga yoki Rossiyaga noqonuniy ko’chirilgani haqida ma’lumot beradi. “Ushbu ko‘chish jarayonida bolalar o‘z oilalaridan xalqaro gumanitar huquqlar buzilgan holda ajratildi”, — deydi huquq himoyachilari.
Hisobotni tayyorlashda Amnesty 88 kishi, jumladan, 48 nafar Mariupol aholisi bilan suhbatlashdi. Ular Rossiya qo‘shinlari ko‘chirilgan aholini “filtrdan o‘tkazgan”ini aytgan. Xususan, ba’zilar o‘zboshimchalik bilan hibsga olingani, kaltaklangani, elektr toki bilan qiynoqqa solingani va qatl etish bilan tahdid qilingani ta’kidlandi.
“Boshqalar esa oziq-ovqat va suvdan mahrum bo‘ldi, ko‘plar xavfli sharoitlarda va kameralar qurshovida saqlandi”, — degan suhbatdoshlardan biri.
“Rossiyaning majburan ko‘chirish va deportatsiya qilish bo‘yicha qoralangan harakatlari harbiy jinoyat hisoblanadi. Amnesty International ularni insoniyatga qarshi jinoyat sifatida kvalifikatsiyalab, tergov qilishi kerak”, — degan tashkilot bosh kotibi Agnes Kallamard.
Amnesty International avvalgi hisobotida Ukraina tomonidan harbiy qonunlar buzilganini ma’lum qilgandi. Ukraina harbiy texnika va qurollarni maktab va kasalxonalarga joylashtirish orqali urush qonunlarini buzayotgani hamda bu harakatlari bilan tinch aholi hayotini xavf ostiga qo‘yayotgani ta’kidlagan. Ukraina prezidenti devoni bu hisobotga o‘z munosabatini bildirgandi. Unda Ukraina urush va xalqaro gumanitar huquqning barcha qonunlariga doimo rioya qilib kelgani aytilgan.
Izoh (0)