“Rossiya qo‘shinlarining Xersondan chekinishi Ukrainaning navbatdagi g‘alabasi bo‘ladi” — NATO bosh kotibi

NATO bosh kotibi Yens Stoltenberg Rossiya qo‘shinlarining Xersondan chekinishi Ukraina uchun yana bir g‘alaba hisoblanishini ma’lum qildi. Bu haqda Reuters xabar berdi.

Stoltenbergning so‘zlariga ko‘ra, Ukraina armiyasi rus qo‘shinlariga tobora ko‘proq bosim o‘tkazmoqda. Bu vaziyat Xerson viloyatida shunday rivojlanganki, Rossiya kuchlari shaharni tark etishga majbur bo‘ldi. U yaqin kunlarda alyans Rossiya haqiqatan ham Dneprning g‘arbiy qirg‘og‘idan chekinish yoki chekinmasligini nazorat qilishini aytdi. Bosh kotibning qo‘shimcha qilishicha, NATO Ukrainani qancha vaqt kerak bo‘lsa, shuncha qo‘llab-quvvatlaydi.

NATO ittifoqchilari tomonidan ko‘rsatilayotgan misli ko‘rilmagan yordam jang maydonidagi vaziyatni har kuni o‘zgartirmoqda. Bu Ukraina taraqqiyoti uchun muhim bo‘lib qolmoqda, — deydi u.