Amnesty International ташкилоти Россия қўшинлари Украинада босиб олинган ҳудудлардан тинч аҳолини мажбуран кўчиргани ва депортация қилгани бўйича ҳисобот эълон қилди.
Ҳисобот «Босқичма-босқич» дея номланиб, Украинадаги тинч аҳоли Россия назорат остидаги ҳудудларга ёки Россияга ноқонуний кўчирилгани ҳақида маълумот беради. «Ушбу кўчиш жараёнида болалар ўз оилаларидан халқаро гуманитар ҳуқуқлар бузилган ҳолда ажратилди», — дейди ҳуқуқ ҳимоячилари.
Ҳисоботни тайёрлашда Amnesty 88 киши, жумладан, 48 нафар Мариупол аҳолиси билан суҳбатлашди. Улар Россия қўшинлари кўчирилган аҳолини «фильтрдан ўтказган»ини айтган. Хусусан, баъзилар ўзбошимчалик билан ҳибсга олингани, калтаклангани, электр токи билан қийноққа солингани ва қатл этиш билан таҳдид қилингани таъкидланди.
«Бошқалар эса озиқ-овқат ва сувдан маҳрум бўлди, кўплар хавфли шароитларда ва камералар қуршовида сақланди», — деган суҳбатдошлардан бири.
«Россиянинг мажбуран кўчириш ва депортация қилиш бўйича қораланган ҳаракатлари ҳарбий жиноят ҳисобланади. Amnesty International уларни инсониятга қарши жиноят сифатида квалификациялаб, тергов қилиши керак», — деган ташкилот бош котиби Агнес Калламард.
Amnesty International аввалги ҳисоботида Украина томонидан ҳарбий қонунлар бузилганини маълум қилганди. Украина ҳарбий техника ва қуролларни мактаб ва касалхоналарга жойлаштириш орқали уруш қонунларини бузаётгани ҳамда бу ҳаракатлари билан тинч аҳоли ҳаётини хавф остига қўяётгани таъкидлаган. Украина президенти девони бу ҳисоботга ўз муносабатини билдирганди. Унда Украина уруш ва халқаро гуманитар ҳуқуқнинг барча қонунларига доимо риоя қилиб келгани айтилган.
Изоҳ (0)