Britaniya Mudofaa vazirligi Rossiya qo‘shinlarining Xerson viloyati g‘arbidan chekinishi bir necha kun davom etishi, bu vaqt ichida ular zaif holatda bo‘lishini ma’lum qildi.
Vazirlikka ko‘ra, Rossiya qo‘shinlarini Dneprning g‘arbiy qirg‘og‘ida saqlab qolishiga Ukrainaning Rossiya ta’minot yo‘llariga bergan zarbalari tahdid solgan.
“Rossiya kuchlari chekinish chog‘ida bir nechta ko‘priklarni vayron qildi va Ukraina kuchlarining oldinga siljishini sekinlashtirish hamda kechiktirish uchun minalar qo‘ydi. Xersonning g‘arbiy qirg‘og‘ini yo‘qotish, ehtimol, Rossiyaning Odessaga olib boruvchi quruqlikdagi ko‘prikni qurish bo‘yicha strategik intilishlarini amalga oshirishga to‘sqinlik qilishi mumkin”, — deyiladi vazirlik bayonotida.
Shuningdek, o‘tish punktlari cheklanganligi sababli rus kuchlari Dneprni kesib o‘tish paytida zaiflashishi, Rossiya qo‘shinlarini olib chiqish davomida mudofaa pozitsiyalari va artilleriya o‘qlari yordamida himoya qilish bir necha kun davom etishi mumkin ta’kidlandi.
Xersondan Rossiya qo‘shinlarining chekinishi
9-noyabr kuni Rossiya mudofaa vaziri Sergey Shoygu Xerson viloyatidagi Dnepr daryosining g‘arbiy qirg‘og‘idan rus qo‘shinlarini olib chiqishni buyurgandi.
Ukrainadagi Rossiya kuchlari qo‘mondoni general Sergey Surovikin Dnepr daryosi bo‘yidagi mudofaa pozitsiyalari chekinishini tasdiqlab, asosiy sabab sifatida ta’minot muammolarini ko‘rsatgan.
Izoh (0)