Turkiya prezidenti Rajab Toyyib Erdo‘g‘on Rossiyaning Xerson viloyati g‘arbidan harbiy qismlarni olib chiqish qarorini qo‘llab-quvvatlashini ma’lum qildi. Bu haqda Anadolu xabar berdi.
“Albatta, urush tugashining aniq sanasini aytib bo‘lmaydi. Biroq Rossiyaning Xerson bo‘yicha oxirgi qarori, albatta, ijobiy va muhim qadamdir”, — deydi Erdo‘g‘on.
Shuningdek, u Rossiya prezidenti Vladimir Putin bilan muloqotni davom ettirish rejalari haqida ham ma’lum qilgan. “Biz Turkiyaning vositachilik harakatlari muvaffaqiyat qozonishiga va urushning tinchlikka aylanishiga umid qilamiz”, — deya xulosa qildi Turkiya rahbari.
Ma’lumot uchun, 9-noyabr kuni Xerson viloyatidagi Rossiya qo‘shinlari qo‘mondoni Sergey Surovikin Rossiya mudofaa vaziri Sergey Shoyguga viloyatning o‘ng qirg‘oq qismini tark etishni taklif qilgan va Shoygu taklifni qabul qilgandi.
Surovikinning aytishicha, hozirgi sharoitda Xerson va unga yaqin aholi punktlarini to‘liq ta’minlab bo‘lmaydi. “Vaziyatni baholab, Dneprning chap qirg‘og‘i bo‘ylab mudofaa qilishni taklif etaman”, — degan u. Surovikin qarorini “qiyin” deb atagan, ammo bu odamlar hayotini saqlab qolishini ta’kidlagan. 7-noyabr kuni esa Kremlda Xersondan voz kechish ehtimoli haqida gapirilgan edi.
Izoh (0)