“O‘qituvchilarni majburiy mehnatga jalb etish qat’iyan taqiqlanadi”. XTV o‘qituvchilar uyma-uy yurib topshiriq bajarayotgani aytilgan xabarlarga munosabat bildirdi

Ijtimoiy tarmoqlarda maktab o‘qituvchilari tomonidan hududdagi xonadonlarda yashovchi maktab yoshidagi bolalar haqida ma’lumotlar yig‘ilayotgani haqida xabar tarqaldi. Xalq ta’limi vazirligi holatga munosabat bildirdi.

Qayd etilishicha, vazirlik tomonidan hududiy xalq ta’limi bo‘linmalari va ta’lim muassasalarga hech qanday alohida topshiriqlar berilmagan.

Maktab rahbariyati o‘z maktabiga biriktirilgan mikrohududda yashayotgan va kelgusida maktabga kelishi mumkin bo‘lgan bolalar to‘g‘risidagi ma’lumotga ega bo‘lishi kerak.

Bu jarayon bugungi kunda elektron tizim orqali amalga oshirilib, buning uchun maktab pedagoglari uyma-uy yurishi zaruriyati yo‘q. So‘nggi 2 yildan buyon Toshkent shahri va viloyatlar markazlaridagi umumta’lim maktablarida 1-sinfga qabul jarayonlari elektron shaklda (onlayn) amalga oshirilmoqda.

Buning uchun vazirlikning elektron axborot tizimi (my.maktab.uz) tegishli vazirlik idoralar bilan integratsiya qilingan holda ma’lumotlar olinmoqda. Xususan qabul jarayonlarida ota-onalarning yashash manzili to‘g‘risidagi ma’lumotlar Ichki ishlar vazirligining manzil-ro‘yxat axborot tizimi bilan, mikrohudud (mahalla) to‘g‘risidagi ma’lumotlar esa axborot tizimlarni integratsiya qilingan holda aniqlanadi.

Joylardagi ayrim rahbarlarning “tashabbusi” bilan mikrohudud bo‘yicha ma’lumotlarni yig‘ish jarayoniga pedagog-xodimlarni jalb qilish va ularni faoliyatiga aloqador bo‘lmagan ishlarga jalb qilish esa mutlaqo taqiqlanganini eslatib o‘tamiz”, — deyiladi XTV axborot xizmati munosabatida.

Xalq ta’limi vazirligi barcha maktab direktorlari va pedagog xodimlariga ularning lavozim majburiyatlariga kirmaydigan ishlarga jalb etish qat’iyan ta’qiqlanganini eslatib o‘tgan.