Samarqandda O‘zbekiston—Vengriya biznes-forumida bosh vazir o‘rinbosari — investitsiyalar va tashqi savdo vaziri Jamshid Xo‘jayev investorlar nima uchun O‘zbekistonni tanlashi kerakligini aytdi.
Uning so‘zlariga ko‘ra, birinchi navbatda investitsiyalar uchun qulay muhit mavjud. Investorlar huquqlari qonun bilan himoyalanishi bo‘yicha amaliy tizim yaratildi. Natijada 2017-yildan boshlab (3,3 mlrd dollar) to‘g‘ridan to‘g‘ri xorijiy investitsiyalar hajmi 2,5 barobarga oshdi (8,6 mlrd dollar).
Qariyb 8 mingta tovar turlariga import bojlari kamaytirildi. Biznesga oid har xil turdagi 70 ta litsenziya va 34 ta ruxsatnomalar berilishi bekor qilindi. Shuningdek, yangi biznes subyektlarini ro‘yxatdan o‘tkazish tartibi soddalashtirildi. Yer uchastkalari onlayn savdolar orqali taqdim etilmoqda.
Ikkinchidan, iqtisodiyotni barqaror rivojlantirish siyosati. O‘zbekiston iqtisodiyotining yillik o‘rtacha o‘sishi 5 foizni, sanoat sohalari 8 foizni tashkil etmoqda. 2021-yilda bu ko‘rsatkich 7 foizdan ortdi. Eksport hajmlari 1,5 barobarga oshdi.
O‘zbekiston aholisi 72 million kishilik Markaziy Osiyo va 300 million kishilik Mustaqil davlatlar hamdo‘stligi bozorlariga chiqish imkoniyatiga ega.
Shu bilan birga, GSP+ kengaytirilgan preferensiyalar tizimi Yevropa bozorlariga 6 mingdan ortiq mahalliy mahsulotlar turlarini imtiyozli shartlarda eksport qilish imkoniyatini yaratdi. Shu tufayli Yevropa mamlakatlariga qilingan eksportimiz xajmi bu yilning o‘zida 70 foizga oshdi.
Uchinchidan, O‘zbekiston iqtidorli, yosh va yuqori salohiyatga ega kadrlarga boy. Aholining 60 foizidan ortig‘ini 30 yoshgacha bo‘lgan yoshlar tashqil etadi. Ular bilimga intiluvchan, turli kasb-hunarlarni o‘zlashtirishga ishtiyoqi baland hamda chet tillarida so‘zlashadigan oliy ma’lumotga ega fuqarolar va yoshlardir.
To‘rtinchidan, O‘zbekistonda tabiiy boyliklarning ulkan zaxiralari mavjud. Oltin resurs bazasi bo‘yicha dunyoda 2-o‘rinni, mis bo‘yicha — 7, volfram bo‘yicha —8, kumush bo‘yicha — 9, uran bo‘yicha 12 — o‘rinni, tabiiy gaz ishlab chiqarish bo‘yicha esa 16-o‘rinni egallaydi.
Bular nafaqat tog‘-konchilik, balki, elektrotexnika, rangli metallurgiya va mashinasozlik kabi sohalarda yangi texnologiyalar yordamida ishlab chiqarilgan mahsulotlarni uchinchi mamlakatlarga chiqish uchun ulkan zamin yaratadi.
Beshinchidan, tadbirkorlik subyektlari ishlab chiqarishlari uzluksizligini ta’minlash maqsadida barcha zarur infratuzilmalar yaratilmoqda. Joylarda sanoat, qishloq xo‘jaligi, farmatsevtika va turizmga ixtisoslashgan 22 ta maxsus iqtisodiy zonalar barpo etildi. Ushbu zonalar avtomobil yo‘llari, elektr energiya, tabiiy gaz, ichimlik suvi va kanalizatsiya, internet tarmog‘i kabi barcha muhandislik kommunikatsiya infratuzilmalari bilan ta’minlangan.
Shuningdek, mazkur zonalarda faoliyat yuritayotgan tadbirkorlarga 10 yilgacha mol-mulk, yer, suv resurslaridan va foyda soliqlaridan ozod qilinadi.
Oltinchidan, ishlab chiqaruvchilarni qo‘llab-quvvatlash maqsadida ularga moliyaviy yordam va subsidiyalar taqdim etilmoqda. Mahalliy ishlab chiqaruvchilar o‘z mahsulotlarini eksport qilishini rag‘batlantirish uchun transport harajatlarining 70 foizgacha qoplab berish mexanizmi yaratilgan
Shuningdek, investorlar bilan qo‘shma loyihalarni birgalikda moliyalashtirish uchun Investitsiyalar jamg‘armasini ta’sis etilgan.
Yettinchidan, O‘zbekiston yirik transport yo‘laklari kesishuvida joylashgan bo‘lib, G‘arb bilan Sharq, Shimol bilan Janub mamlakatlari bozorlari o‘rtasida ko‘prik vazifasini, muhim logistika maydoni vazifasini ham bajara oladi.
Mavzuga doir: O‘zbekistonning Jahon savdo tashkilotiga qo‘shilish jarayoni jadallashtiriladi
Izoh (0)