8-noyabr kuni bosh vazir o‘rinbosari — investitsiyalar va tashqi savdo vaziri Jamshid Xo‘jayev eng yirik xalqaro marketpleyslardan biri hisoblangan Wildberries kompaniyasi asoschilari Vladislav va Tatyana Bakalchuklarni qabul qildi, deb xabar bermoqda vazirlik matbuot xizmati.
Qayd etilishicha, uchrashuvda O‘zbekiston elektron tijorat bozorida talabning o‘sayotgani, uning hajmi yil oxiriga qadar 1 milliard dollarni tashkil qilishi kutilayotgani, bu Internetning keng qamrovligi va yosh faol foydalanuvchilarning ko‘pligi bilan bog‘liqligi haqida so‘z bordi.
Tayyor o‘zbek mahsulotlarini marketpleys orqali sotish uchun kompaniyaning logistika kompleksini O‘zbekistonda tashkil qilish istiqbollari muhokama qilindi. Toshkentda barcha tegishli xizmatlarni ko‘rsatuvchi Wildberries logistika majmuasini, shuningdek, tovarlarni ro‘yxatga olish tartibini soddalashtirish uchun bojxona va sertifikatlashtirish organlarining “yagona oyna” xizmatlariga ega saralash markazini tashkil etish bo‘yicha kelishuvga erishildi.
Loyihaning umumiy qiymati 130 million dollarni tashkil etadi. Loyiha ishga tushishi bilan 5000 ta yangi ish o‘rni yaratiladi.
Shu nuqtai nazardan, marketpleys orqali sotishga chiqarish uchun birinchi bosqichda o‘zbek ishlab chiqaruvchilari tomonidan 900 million dollardan ortiq to‘qimachilik mahsulotlari, 121,5 million dollarlik charm mahsulotlari, 172,2 million dollarlik maishiy elektrotexnika buyumlari hamda 382,5 million dollarlik qurilish materiallari yetkazib berishga tayyorlik bildirildi.
Loyihani amalga oshirish doirasida kompaniya o‘zbekistonlik tadbirkorlarni sotuvchilar sifatida ro‘yxatdan o‘tkazish imkoniyatini yaratadi, elektron platformada ishlash va o‘z tovarlari sotish ko‘nikmalarini shakllantirish maqsadida o‘zbek va rus tillarida o‘zbek ishlab chiqaruvchilari uchun onlayn seminarlar o‘tkazadi, shuningdek, yangi o‘zbek brendlarini yaratish fabrikasini ishga tushiradi. Unda marketing tadqiqotlari, bozor tahlillari o‘tkaziladi va tegishli brendlar ishlab chiqiladi.
Ma’lumot uchun, Wildberries kompaniyasi 2004-yilda tashkil etilgan va bugungi kunda universal formatdagi eng yirik onlayn gipermarketdir. Marketpleys orqali kiyim-kechak, poyabzal, elektronika, bolalar va uy-ro‘zg‘or buyumlarining jahonda eng mashhur brendlari mahsulotlari sotiladi.
Wildberries bugungi kunda dunyoning 20 ta mamlakatida, shu jumladan, Rossiya, Qozog‘iston, Belarus, Germaniya, Fransiya, Buyuk Britaniya, Boltiqbo‘yi mamlakatlari, AQSh va boshqa ko‘plab mamlakatlarda o‘z faoliyatini olib bormoqda.
Kompaniya 2022-yilning fevralida O‘zbekistonda o‘z faoliyatini yo‘lga qo‘ygani haqida “Daryo”ga ma’lum qilgandi.
Izoh (0)