Instagram ijtimoiy tarmog‘i o‘z ilovasiga asosiy tasma va Stories’dagi kechiktirilgan postlarni, shuningdek, Reels videolarini rejalashtirish va chop etish funksiyasini qo‘shdi. Bu haqda xizmat vakillari rasmiy akkauntiga tayanib Forbes xabar bermoqda.
Yangi funksiyadan professional akkaunt egalari foydalanishi mumkin. Bu uchun ilova sozlamalarida sahifa holatini oddiydan professionalga o‘zgartirish kerak bo‘ladi.
Mazkur funksiya ijtimoiy tarmoqning ayrim foydalanuvchilari bilan bir necha haftalik sinovdan so‘ng ishga tushirilgan.
Siz buni so‘ragansiz va biz eshitdik! Instagram ilovasida kontentni rejalashtirish vositalarini ishga tushirmoqdamiz. Shuning uchun siz post yoki videoni 75 kungacha rejalashtirishingiz mumkin. Bu xususiyat kelgusi haftalarda butun dunyo bo‘ylab tarqaladi, bizni kuzatib boring, — deyiladi ijtimoiy tarmoq vakillari xabarida.
Oktyabr oyi oxirida Bloomberg Meta’ning daromadlari haqidagi hisobotiga tayanib, Instagram’ning oylik faol foydalanuvchilari soni dunyo bo‘ylab 2 milliard akkauntga yetganini ma’lum qilgandi.
Izoh (0)