Usmonovning boyligi 3,4 mlrd dollarga kamaygan: Rossiyalik milliarderlar yil boshidan beri 83,4 mlrd dollar yo‘qotdi
2022-yil boshidan buyon rossiyalik eng boy tadbirkorlarning umumiy boyligi 83,4 mlrd dollarga kamaydi. Bu haqda Bloomberg Billionaires Index (BBI) ma’lumotlariga asoslangan holda “RIA Novosti” xabar bermoqda.
“Renova” egasi Viktor Vekselberg eng ko‘p mablag‘ yo‘qotdi, uning boyligi 11,2 mlrd dollarga kamayib, 7,32 mlrd dollarga bo‘lib qoldi.
Yil boshidan beri Rossiyaning eng boy odami Vladimir Potanin 1 mlrd dollar yo‘qotgan. Uning boyligi hozirda 29,8 mlrd dollarni tashkil qiladi.
2022-yilda “Novatek” hammuallifi Leonid Mixelsonning boyligi 8 milliard dollarga qisqargan bo‘lsa, yana bir milliarder Aleksey Mordashov 7,78 mlrd dollar yo‘qotgan.
“Metalloinvest” egasi, asli kelib chiqishi o‘zbek bo‘lgan Alisher Usmonov joriy yilda 3,38 mlrd dollar yo‘qotgan. Uning boyligi hozirda 17,9 mlrd dollarni tashkil qiladi.
Bloomberg indeksi milliarderlarga tegishli kompaniyalar aksiyalari qiymatidan kelib chiqib hisoblanadi.
Ro‘yxatga 25 nafar rossiyalik kiritilgan bo‘lib, ularning umumiy boyligi bugungi kunda 299,63 milliard dollarga baholanmoqda.
