Telegram jamoasi ilovaning yangi versiyasini taqdim qildi.
Bu safargi yangilanishda katta guruhlarda muhokamalarni tartiblashda yordam beradigan mavzular, xavfsiz blokcheyn orqali xarid qilish mumkin bo‘lgan yangi kolleksiyalanadigan foydalanuvchi nomlari, video xabarlarni matnga aylantirish imkoniyati va boshqalar taqdim etildi.
Guruhlardagi mavzular
Telegram guruhlari yuz minglab foydalanuvchiga ega yirik hamjamiyatlarni dastaklaydi. Bu chatlarni o‘qish oson bo‘lishi uchun 200 tadan ortiq a’zoga ega guruhlar endi mavzularni yoqishi va istalgan mavzu uchun alohida maydon yaratishi mumkin.
Yangi funksiya turli savollar muhokamasini asosiy guruh ichida turli chatlarga bo‘lish imkonini beradi. Har bir mavzu uchun yangi xabarlar haqidagi bildirishnomalarni alohida sozlash va ularda joylangan medialarni (“Umumiy media”) ko‘rish mumkin.
Ishtirokchilar so‘rovnomalar, qadalgan xabarlar va botlar kabi barcha sevimli funksiyalaridan foydalangan holda “Anime”dan tortib “Zoologiya”gacha istalgan mavzuda suhbatlashishi mumkin.
Bu funksiya katta guruhlar uchun maxsus yaratilgan. Ular chatlarni alohida sozlashning yangi imkoniyatlarini ochadi va muhokamalarga qiziqishni ushlab turishga yordam beradi.
Telegram jamoasi yil oxirigacha kichik guruhlar uchun alohida vositalar majmuasini tayyorlashni ham rejalashtirmoqda.
Guruh adminlari mavzularni Guruh sozlamalarida yoqishi va Ruxsatlar ruknida kimlarga mavzular yaratish va boshqarish ruxsati berilishini boshqarishi mumkin.
Telegram’da har doim bo‘lgani kabi kelgusi yangilanishlarda ushbu funksiya adminlar va foydalanuvchilar uchun qo‘shimcha qulay vositalar bilan boyitiladi.
Video xabarlar uchun ovozni matnga aylantirish
Telegram Premium ishga tushirilganidan buyon obunachilar istalgan ovozli xabarni tinglashdan ko‘ra o‘qish qulayroq bo‘lgan holatlar uchun matnga aylantira olish imkoniyatga ega bo‘lgan edi.
Bu yangilanishda ayni funksiya video xabarlarga ham qo‘shildi. Bu Premium foydalanuvchilarga tezkor matn transkripsiyasini olish imkonini beradi.
Yangi emoji to‘plamlari
Minglab foydalanuvchilar maxsus emoji to‘plamlarini yaratishni qiziqish bilan sinab ko‘rmoqda.
Ulardan Telegram rassomlari ham ortda qolmayapti: ular ushbu yangilanishga 12 ta yangi emoji to‘plamini tayyorlashdi. Premium foydalanuvchilar ushbu emojilardan istalgan xabar va izohlarda foydalanishi yoki ularni Xellouin uchun statuslar sifatida belgilashi mumkin:
iOS uchun ilovada yangi dizayndagi tungi rejim
iOS uchun ilovada tungi rejim dizayni yangilandi: yanada muvozanatlangan ranglar birikmasi tanlandi hamda xabarlar va chatlar ro‘yxatini varaqlashda xiralashtirish effekti yaxshilandi.
Android uchun ilovada matn o‘lchamini o‘zgartirish
Android uchun ilovadagi “Chat sozlamalari” menyusida matn o‘lchami o‘zgartirilsa, barcha chat matnlari, jumladan, havolaga razm solish ekrani, xizmat xabarlari va boshqalar o‘lchami ham o‘zgaradi.
Izoh (0)