Ukraina prezidenti ma’muriyati Qrimni qaytarish bo‘yicha reja ishlab chiqmoqda, yarim orolni qaytarishning ham siyosiy-diplomatik, ham harbiy usullari ko‘rib chiqilmoqda. Bu haqda Ukraina prezidenti Vladimir Zelenskiyning Qrimdagi vakili Tamila Tasheva Amerikaning The Daily Beast gazetasiga ma’lum qildi.
Uning so‘zlariga ko‘ra, “siyosiy-diplomatik yo‘l” yarim orolni qaytarib olishning asosiy mexanizmi hisoblanadi, biroq ushbu jarayonda “harbiy komponentlar” istisno qilinmaydi.
Qrim hududida eng so‘nggi hujumlardan biri 29-oktabr kuni Sevastopol qo‘ltig‘ida dengiz va havo dronlaridan foydalanib kemalarga berilgan zarbalar bo‘lgan edi. Moskva hodisani “terakt” deb atadi va hujum Ukraina harbiylari tomonidan britaniyalik mutaxassislar yordamida amalga oshirilganini aytdi.
Kiyev hujumga aloqadorligini rasman tasdiqlagani yo‘q.
31-oktabr kuni esa Rossiya harbiylari Ukraina energetika infratuzilmasiga yana bir marta zarbalar berdi. Rossiya prezidenti Vladimir Putin bu xatti-harakatlar “qisman” Sevastopoldagi teraktga javob bo‘lganini aytdi.
Ma’lumot uchun, 2014-yil mart oyida Qrimda referendum bo‘lib o‘tgan, unda yarimorol aholisining aksariyati Rossiyaga qo‘shilishni qo‘llab-quvvatlagan. Ukraina va bir qator G‘arb davlatlari ovoz berish natijalarini tan olmaydi va sodir bo‘lgan voqealarni “anneksiya” deb hisoblaydi. AQSH Qrimning Rossiyaga qo‘shilishini hech qachon tan olmaslikka so‘z bergan. Rossiya hukumati bir necha bor Qrim masalasi tarixan yopiq ekanini ta’kidlagan.
2022-yilning mart oyida Rossiya prezidenti matbuot kotibi Dmitriy Peskov Qrimning Rossiya hududi sifatida tan olinishi Ukrainadagi bosqinni to‘xtatishi mumkin bo‘lgan shartlardan biri bo‘lishini aytgan.
Izoh (0)