Tojikiston ekstremal ekologik zarbalarni bartaraf etish uchun zarur resurslarga ega bo‘lmagan davlatlardan biri deb topildi. Shu bois mamlakat Yerning ekologik “qaynoq nuqtalari” ro‘yxatiga kiritildi, deb xabar bermoqda Asia-Plus.
Iqtisodiyot va tinchlik instituti 228 mamlakatni qamrab olgan “Atrof-muhit tahdidlari” to‘g‘risidagi yillik hisobotini e’lon qildi. Hisobotning asosiy maqsadlaridan biri ekstremal ekologik zarbalarni bartaraf etish uchun zarur resurslarga ega bo‘lmagan mamlakatlar va hududlarni aniqlashdan iborat.
Hisobot mualliflari 56 foiz mamlakat bugun jiddiy ekologik tahdidga duch kelmoqda, degan xulosaga keldi.
Tadqiqotda umumiy aholisi 768 million kishi bo‘lgan 27 ta davlat aniqlandi, bular ekologik va iqlim tahdidlari bo‘yicha sayyoramizning “qaynoq nuqtalari” hisoblanadi. Ular orasida Markaziy Osiyodan yagona davlat — Tojikiston ham bor, — deyiladi xabarda.“Qaynoq nuqtalar” ro‘yxatiga Afrika va Yaqin Sharqning 24 davlati, Venesuela va Afg‘oniston kiradi.
Hisobot mualliflarining fikricha, dunyoning ushbu “qaynoq nuqtalari”da aholi sonining tez o‘sishi, suv tanqisligi xavfi va oziq-ovqat xavfsizligi kabi ekologik tahdidlar iqlim o‘zgarishi bilan kuchayib, ommaviy migratsiya va mojarolarga sabab bo‘lmoqda.
Tabiiy resurslar va qishloq xo‘jaligi bo‘yicha iqtisodchi Matias Leytner va Osiyo taraqqiyot bankining iqlim o‘zgarishi bo‘yicha mutaxassisi Malte Maassning fikricha, Tojikiston allaqachon iqlim o‘zgarishi ta’siridan aziyat chekmoqda: muzliklar tobora ko‘proq erib, suvlarning ko‘proq oqib ketishiga olib kelmoqda, bu esa keyinchalik suv hajmining asta-sekin kamayishiga sabab bo‘ladi.
Kuchli qurg‘oqchilik va haroratning oshishi bilan birgalikda bu ta’sirlar Tojikiston qishloq xo‘jaligi hamda energetika sektori uchun katta muammo tug‘diradi, chunki mamlakatda iste’mol qilinadigan elektr energiyasining katta qismi gidroenergetikadan olinadi.
Bundan tashqari, yillik “Atrof-muhit tahdidlari” haqidagi hisobotda iqlim va atrof-muhit degradatsiyasining mojarolar, fuqarolik tartibsizliklari va ommaviy migratsiya xavfi yuqori bo‘lgan mamlakatlarga ta’siri tahlil qilingan.
Izoh (0)