Germaniya hukumati milliarder Alisher Usmonovga tegishli deb taxmin qilinayotgan 30 ta kartinani, shu jumladan, rassom Mark Shagalning san’at asarini musodara qildi, deb xabar beradi Sueddeutsche Zeitung.
Nashr ma’lumotlariga ko‘ra, umumiy qiymati besh million yevroga teng san’at asarlari dastlab 156 metrli “Dilbar” yaxtasida bo‘lgan, u esa Usmonovga tegishli deb da’vo qilinadi. 2021-yilda kema ta’mirlash ishlari o‘tkazilishi uchun Gamburgda to‘xtagan, shundan keyin kartinalar Hamburger Spedition kompaniyasi omboriga olib o‘tilgan.
Germaniya hukumati 600 million dollarlik “Dilbar” yaxtasini 2022-yil martida — Rossiya Ukrainaga bostirib kirishi tufayli Usmonovga nisbatan sanksiyalar kiritilganidan keyin qo‘lga olgan. Germaniya qonunlariga ko‘ra, Usmonov mamlakat hukumatini u yerdagi barcha aktivlari, shu jumladan, kartinalar haqida ham xabardor qilishi kerak bo‘lgan, ammo bunday qilmagan, deb yozadi nashr.
Alisher Usmonov musodara qilingan kartinalar, yaxta va villaga aloqadorligini rad etmoqda. Bu mulklarning barchasi u nazorat qilmaydigan fondlarga tegishli, dedi milliarderning vakili.
Germaniya politsiyasi Usmonovga tegishli deb hisoblaniladigan yaxtani tintuv qildi
Bu orada Usmonovga qarshi surilayotgan pul yuvish ayblovlari yuzasidan surishtiruv olib borayotgan Germaniya politsiyasi mamlakat shimolida motorli yaxtani tintuv qildi, bu haqda Frankfurt-Mayn prokuraturasi xabar berdi.Prokuratura bayonotida yaxtaning nomi ham, uning egasining ismi ham oshkor etilmagan, biroq gap 69 yoshli rossiyalik biznesmen haqida borayotgani, tintuv esa o‘tgan hafta politsiya Usmonov nomiga ro‘yxatdan o‘tkazilgan villani taftish qilgan surishtiruv doirasida olib borilgani aytilgan. Ba’zi OAVlar gap Usmonovga tegishli bo‘lgan “Dilbar” yaxtasi haqida ketayotganini ma’lum qilgan.
Germaniyadagi villalar va obyektlardagi tintuvlar
21-sentabr kuni butun Germaniya bo‘ylab joylashgan, Yevroittifoq sanksiyalari ostida bo‘lgan Usmonovga aloqador 24 ta obyektda bir vaqtning o‘zida tintuvlar o‘tkazildi. Muzlatib qo‘yilgan mablag‘lar va obyektlardan iqtisodiy maqsadlarda foydalanishni taqiqlovchi sanksiya rejimini buzganlik yuzasidan gumonlar tintuvlar uchun asos bo‘ldi.Bundan tashqari, rossiyalik oligarxni soliqlar to‘lashdan bosh tortishda ayblashmoqda. 2014-yildan 2022-yilgacha bo‘lgan davrda Usmonov jami 555 million yevroga teng daromad va sovg‘a soliqlarini to‘lamay kelgan. Bundan tashqari, aftidan, Germaniyada Usmonovni obro‘sizlantiruvchi materiallar to‘planmoqda, pul yuvish bo‘yicha gumonlar ham, katta ko‘lamli tintuvlar ham yangi surishtiruvning boshlanishi bo‘lgan, deb yozadi Süddeutsche Zeitung gazetasi.
Alisher Usmonovning vakillari oligarxga nisbatan ayblovlarni rad etmoqda
Biznesmenning vakillari da’vo qilishicha, Usmonovning Germaniyada ko‘chmas mulki yo‘q, Bavariyada Tegernze ko‘lidagi villa esa oilaviy trastlarga tegishli bo‘lib, ular tomonidan “bozor narxi bo‘yicha” ijaraga olingan.Shuningdek, ta’kidlanishicha, rossiyalik milliarder “hech qachon Germaniya soliq rezidenti bo‘lmagan”, shuning uchun unga nisbatan soliqlardan bosh tortish haqidagi masalalar yuzaga kelishi mumkin emas. Umuman, Usmonovning matbuot xizmati ayblovlarni “asossiz va tuhmatdan iborat” deb, tintuvlar va OAVlarda bu haqda xabarlar paydo bo‘lishini esa “yagona aybi Rossiyada aktivlari borligi bo‘lgan metsenatning siyosiy ta’qib qilinishi” deb atadi.
Usmonovga qarshi sanksiyalar
USM Holdings asoschisi, milliarder Alisher Usmonov 28-fevral kuni, Ukrainada Rossiya operatsiyasi boshlanganidan keyin to‘rt kun o‘tib, Yevroittifoq sanksiyalariga uchragan edi. Biznesmen Bryusselning bu qaroridan norozi bo‘lib, may boshida Yevropa umumiy yurisdiksiya sudiga apellyatsiya berdi. U suddan apellyatsiya bo‘yicha yakuniy qaror qabul qilinguniga qadar sanksiyalar amal qilishini to‘xtatib qo‘yishni so‘radi. Usmonovga qarshi AQSH, Kanada, Buyuk Britaniya va Yaponiya ham sanksiyalar kiritgan.May oyining ikkinchi yarmida Usmonov The Times gazetasi talqini bo‘yicha Buyuk Britaniyaning eng badavlat odamlari o‘nligidan chiqib ketdi.
Izoh (0)