Amerikaning Maxar kompaniyasi tomonidan olingan sun’iy yo‘ldosh tasvirlari tahlili shuni ko‘rsatdiki, Mariupol yaqinida 1500 dan ortiq yangi qabrlar paydo bo‘lgan, deb yozadi BBC News.
Uchta yangi mozorlar tasvirlarini Britaniyaning Axborot barqarorligi markazi o‘rganib chiqdi. Ekspertlar xulosasiga ko‘ra, qabrlar 2022-yil iyunidan oktabriga qadar bo‘lgan davrda paydo bo‘lgan. Markaz ma’lumotlariga qaraganda, urush davomida bu yerda jami 4600 dan ortiq qabrlar kovlangan. Mutaxassislar qayd etishicha, tasvirlarga qarab bu yerga aynan necha kishi ko‘milganini aniqlab bo‘lmaydi.
Yozda mahalliy fuqarolardan biri Tatyana o‘z o‘g‘lini qidirib, ommaviy qabrlar kovlangan joyga kelgan. U BBC’ga ma’lum qilishicha, o‘sha paytda 800 dan ortiq yangi qabrlarni ko‘rgan. Qabrlarga tablichkalar o‘rnatilgan bo‘lib, ularga ismlar yozilmagan, faqat raqam va jinsi ko‘rsatilgan xolos. “Jasadlarning ko‘pchiligining shaxsi aniqlanmagan”, — dedi ayol.
2022-yil mayida Mariupol meri maslahatchisi Pyotr Andryushchenko shaharda kamida 22 ming kishi halok bo‘lganini ma’lum qilgandi. Iyun holatiga BMT 1348 nafar tinch aholi (shularning 70 nafari — bolalar)ning o‘limini tasdiqlay oldi, xolos. BMTning Inson huquqlari bo‘yicha oliy komissari Mishel Bachelet ma’lum qilishicha, halok bo‘lganlar soni aslida bundan ko‘p marta oshiqroq bo‘lishi mumkin. Shuningdek, BMT ommaviy o‘qqa tutishlar oqibatida shaharda ko‘p qavatli turar joylarning 90 foizgacha bo‘lgan qismi zarar ko‘rgani yoki vayron bo‘lganini ma’lum qilgandi. BBC guvohlarga tayanib yozishicha, vayronalar ostidan jasadlarni chiqarib olish ishlari so‘nggi oylar mobaynida davom etgan.
Izoh (0)