AQSHning sobiq prezidenti Donald Tramp Ogayo shtatidagi siyosiy mitingda 15-noyabr kuni Floridadagi Mar-a-Lago qarorgohida “katta bayonot” berishini aytdi.
“15-noyabr kuni Mar-a-Lagoda juda muhim xabarni e’lon qilmoqchiman”, — dedi Tramp.
Sobiq prezident, shuningdek, 8-noyabr kuni bo‘lib o‘tadigan oraliq saylovlar, undan keyin Respublikachilar partiyasi vakillari AQSH Kongressining har ikki palatasida ko‘pchilikni tashkil qilishi “mamlakat uchun qutqaruvchi” bo‘lishi mumkinligini ta’kidladi.
“Bu yil biz Vakillar palatasini qaytarib olamiz. Senatni qaytarib olamiz. Va Amerikani qaytarib olamiz. 2024-yilda esa, eng muhimi, biz go‘zal Oq uyimizni qaytarib olamiz”, — dedi Tramp.
8-noyabr kuni AQSH Kongressi Vakillar palatasi va Senati uchun (parlamentning quyi va yuqori palatalari) oraliq saylovlar bo‘lib o‘tadi. Hozirda Vakillar palatasida ko‘pchilik o‘rin demokratlarga tegishli bo‘lib, ularning ixtiyorida 218 ta o‘rin bor. Respublikachilar esa 212 ta o‘ringa ega. Shu bilan birga, yuqori palatada respublikachilar 50 o‘ringa, demokratlar esa 48 o‘ringa ega.
Ushbu saylovlar natijasida Vakillar palatasi tarkibi butunlay yangilanadi, shuningdek, 100 nafar senatordan 35 nafari saylanadi. Avvalroq Bloomberg so‘rovnomalarga tayanib, ovoz berishdan so‘ng demokratlar Kongressning ikkala palatasida ham yetakchilikni qo‘ldan chiqarishi mumkinligi haqida xabar bergandi.
Noyabr oyi boshida Reuters va The Washington Post (WP) nashrlari Tramp yaqin kunlarda prezidentlik uchun o‘z saylovoldi kampaniyasini boshlashi haqida e’lon qilishi kutilayotganini xabar bergan.
Izoh (0)