Украина президенти маъмурияти Қримни қайтариш бўйича режа ишлаб чиқмоқда, ярим оролни қайтаришнинг ҳам сиёсий-дипломатик, ҳам ҳарбий усуллари кўриб чиқилмоқда. Бу ҳақда Украина президенти Владимир Зеленскийнинг Қримдаги вакили Тамила Ташева Американинг The Daily Beast газетасига маълум қилди.
Унинг сўзларига кўра, «сиёсий-дипломатик йўл» ярим оролни қайтариб олишнинг асосий механизми ҳисобланади, бироқ ушбу жараёнда «ҳарбий компонентлар» истисно қилинмайди.
Қрим ҳудудида энг сўнгги ҳужумлардан бири 29 октябрь куни Севастополь қўлтиғида денгиз ва ҳаво дронларидан фойдаланиб кемаларга берилган зарбалар бўлган эди. Москва ҳодисани «теракт» деб атади ва ҳужум Украина ҳарбийлари томонидан британиялик мутахассислар ёрдамида амалга оширилганини айтди.
Киев ҳужумга алоқадорлигини расман тасдиқлагани йўқ.
31 октябрь куни эса Россия ҳарбийлари Украина энергетика инфратузилмасига яна бир марта зарбалар берди. Россия президенти Владимир Путин бу хатти-ҳаракатлар «қисман» Севастополдаги терактга жавоб бўлганини айтди.
Маълумот учун, 2014 йил март ойида Қримда референдум бўлиб ўтган, унда яриморол аҳолисининг аксарияти Россияга қўшилишни қўллаб-қувватлаган. Украина ва бир қатор Ғарб давлатлари овоз бериш натижаларини тан олмайди ва содир бўлган воқеаларни «аннексия» деб ҳисоблайди. АҚШ Қримнинг Россияга қўшилишини ҳеч қачон тан олмасликка сўз берган. Россия ҳукумати бир неча бор Қрим масаласи тарихан ёпиқ эканини таъкидлаган.
2022 йилнинг март ойида Россия президенти матбуот котиби Дмитрий Песков Қримнинг Россия ҳудуди сифатида тан олиниши Украинадаги босқинни тўхтатиши мумкин бўлган шартлардан бири бўлишини айтган.
Изоҳ (0)