Rossiya harbiylari Mariupol atrofida mudofaa istehkomlarini qurishga kirishdi. Bu haqda Britaniya Mudofaa vazirligi Ukrainadagi urushning borishiga oid kunlik sharhida ma’lum qildi.
Mudofaa chizig‘i “ajdaho tishlari” deb nomlanuvchi beton piramidali tankka qarshi bloklardan qurilmoqda. Britaniya harbiylariga ko‘ra, bunday konstruksiyalar Rossiyaning ikkita zavodida ishlab chiqariladi.
“Ajdaho tishlari” Mariupol va Nikolskoye qishlog‘i o‘rtasida, shuningdek, shaharning shimoliy chekkasidan Stariy Krim qishlog‘igacha masofada o‘rnatilgan, deyiladi hisobotda.
Unda ta’kidlanganidek, Mariupol rus qo‘shinlari uchun asosiy ta’minot liniyasi bo‘lib, shaharning o‘zi Rossiya va Qrim o‘rtasidagi strategik “quruqlik ko‘prigi”ning bir qismi hisoblanadi.
Xuddi shu beton konstruksiyalar yordamida, deb yozadi Britaniya vazirligi, Zaporojye viloyatining qo‘shib olingan qismida va Xersonda mudofaa istehkomlari qurilmoqda.
“Rossiya o‘zining hozirgi front chizig‘i ortida mustahkam mudofaa yaratish uchun yirik sa’y-harakatlarni amalga oshirmoqda, bu bilan esa aftidan, yutuqlar bo‘lgan taqdirda, Ukrainaning har qanday tarzda tez olg‘a siljishiga yo‘l qo‘ymaslik maqsad qilingan”, — deyiladi sharhda.
Oktabr oyida “Vagner” yollanma jangarilar guruhi Rossiyaga qo‘shib olingan Lugansk viloyatida mudofaa chizig‘ini qurishni boshlagani xabar qilingandi. O‘nlab kilometr istehkomlar Lisichansk va Lugansk atrofini qamrab olgan bo‘lishi kerak edi. “Vagner”ga asos solgan tadbirkor Yevgeniy Prigojin Ukraina bilan butun chegara bo‘ylab shunday liniyalarni qurishni taklif qilgan.
Biroq, Ikkinchi jahon urushi tajribasi shuni ko‘rsatadiki, bunday mudofaa liniyalarini qurishga investitsiyalar ko‘p hollarda o‘zini oqlamaydi, deb eslatdi Meduza. Ularni yorib yoki chetlab o‘tish mumkin.
Izoh (0)