Германия ҳукумати миллиардер Алишер Усмоновга тегишли деб тахмин қилинаётган 30 та картинани, шу жумладан, рассом Марк Шагалнинг санъат асарини мусодара қилди, деб хабар беради Sueddeutsche Zeitung.
Нашр маълумотларига кўра, умумий қиймати беш миллион еврога тенг санъат асарлари дастлаб 156 метрли «Дилбар» яхтасида бўлган, у эса Усмоновга тегишли деб даъво қилинади. 2021 йилда кема таъмирлаш ишлари ўтказилиши учун Гамбургда тўхтаган, шундан кейин картиналар Ҳамбургер Спедитион компанияси омборига олиб ўтилган.
Германия ҳукумати 600 миллион долларлик «Дилбар» яхтасини 2022 йил мартида — Россия Украинага бостириб кириши туфайли Усмоновга нисбатан санкциялар киритилганидан кейин қўлга олган. Германия қонунларига кўра, Усмонов мамлакат ҳукуматини у ердаги барча активлари, шу жумладан, картиналар ҳақида ҳам хабардор қилиши керак бўлган, аммо бундай қилмаган, деб ёзади нашр.
Алишер Усмонов мусодара қилинган картиналар, яхта ва виллага алоқадорлигини рад этмоқда. Бу мулкларнинг барчаси у назорат қилмайдиган фондларга тегишли, деди миллиардернинг вакили.
Германия полицияси Усмоновга тегишли деб ҳисобланиладиган яхтани тинтув қилди
Бу орада Усмоновга қарши сурилаётган пул ювиш айбловлари юзасидан суриштирув олиб бораётган Германия полицияси мамлакат шимолида моторли яхтани тинтув қилди, бу ҳақда Франкфурт Майн прокуратураси хабар берди.Прокуратура баёнотида яхтанинг номи ҳам, унинг эгасининг исми ҳам ошкор этилмаган, бироқ гап 69 ёшли россиялик бизнесмен ҳақида бораётгани, тинтув эса ўтган ҳафта полиция Усмонов номига рўйхатдан ўтказилган виллани тафтиш қилган суриштирув доирасида олиб борилгани айтилган. Баъзи ОАВлар гап Усмоновга тегишли бўлган «Дилбар» яхтаси ҳақида кетаётганини маълум қилган.
Германиядаги виллалар ва объектлардаги тинтувлар
21 сентябрь куни бутун Германия бўйлаб жойлашган, Евроиттифоқ санкциялари остида бўлган Усмоновга алоқадор 24 та объектда бир вақтнинг ўзида тинтувлар ўтказилди. Музлатиб қўйилган маблағлар ва объектлардан иқтисодий мақсадларда фойдаланишни тақиқловчи санкция режимини бузганлик юзасидан гумонлар тинтувлар учун асос бўлди.Бундан ташқари, россиялик олигархни солиқлар тўлашдан бош тортишда айблашмоқда. 2014 йилдан 2022 йилгача бўлган даврда Усмонов жами 555 миллион еврога тенг даромад ва совға солиқларини тўламай келган. Бундан ташқари, афтидан, Германияда Усмоновни обрўсизлантирувчи материаллар тўпланмоқда, пул ювиш бўйича гумонлар ҳам, катта кўламли тинтувлар ҳам янги суриштирувнинг бошланиши бўлган, деб ёзади Süddeutsche Zeitung газетаси.
Алишер Усмоновнинг вакиллари олигархга нисбатан айбловларни рад этмоқда
Бизнесменнинг вакиллари даъво қилишича, Усмоновнинг Германияда кўчмас мулки йўқ, Баварияда Тегернзе кўлидаги вилла эса оилавий трастларга тегишли бўлиб, улар томонидан «бозор нархи бўйича» ижарага олинган.Шунингдек, таъкидланишича, россиялик миллиардер «ҳеч қачон Германия солиқ резиденти бўлмаган», шунинг учун унга нисбатан солиқлардан бош тортиш ҳақидаги масалалар юзага келиши мумкин эмас. Умуман, Усмоновнинг матбуот хизмати айбловларни «асоссиз ва туҳматдан иборат» деб, тинтувлар ва ОАВларда бу ҳақда хабарлар пайдо бўлишини эса «ягона айби Россияда активлари борлиги бўлган меценатнинг сиёсий таъқиб қилиниши» деб атади.
Усмоновга қарши санкциялар
USM Holdings асосчиси, миллиардер Алишер Усмонов 28 февраль куни, Украинада Россия операцияси бошланганидан кейин тўрт кун ўтиб, Евроиттифоқ санкцияларига учраган эди. Бизнесмен Брюсселнинг бу қароридан норози бўлиб, май бошида Европа умумий юрисдиксия судига апелляция берди. У суддан апелляция бўйича якуний қарор қабул қилингунига қадар санкциялар амал қилишини тўхтатиб қўйишни сўради. Усмоновга қарши АҚШ, Канада, Буюк Британия ва Япония ҳам санкциялар киритган.Май ойининг иккинчи ярмида Усмонов The Times газетаси талқини бўйича Буюк Британиянинг энг бадавлат одамлари ўнлигидан чиқиб кетди.
Изоҳ (0)