7-noyabr kuni Shavkat Mirziyoyev va Turkmaniston Milliy kengashi xalq maslahati raisi Gurbanguli Berdimuhamedovning telefon orqali muloqoti bo‘lib o‘tdi.
Prezident matbuot xizmatining xabar qilishicha, O‘zbekiston bilan Turkmaniston o‘rtasidagi do‘stlik, yaxshi qo‘shnichilik va strategik sheriklik munosabatlarini yanada rivojlantirish va kengaytirishning dolzarb masalalari ko‘rib chiqildi.
Suhbat avvalida davlatimiz rahbari Turkmaniston prezidenti Serdar Berdimuhamedovga o‘zining samimiy salomi va eng ezgu tilaklarini bildirdi.
O‘zbekiston prezidentining 20—21-oktabr kunlari Turkmanistonga amalga oshirilgan rasmiy tashrifi davomidagi oliy darajali uchrashuv va tadbirlarning samarali natijalari yuksak baholandi.
Erishilgan kelishuvlar va imzolangan bitimlarni, shu jumladan faol parlamentlararo muloqotlar va almashinuvlarni davom ettirish orqali amalga oshirish muhimligi qayd etildi.
Shu hafta oxirida Samarqandda o‘tkaziladigan Turkiy davlatlar tashkiloti sammitining kun tartibidagi masalalar ham ko‘rib chiqildi.
Shavkat Mirziyoyev Gurbanguli Berdimuhamedov bilan bundan avval Turkmanistonga rasmiy tashrif doirasida uchrashganida suhbatlashgandi. Ikki tomonlama, mintaqaviy va xalqaro hamkorlik masalalarining keng doirasini muhokama qilib, uchrashuv so‘ngida Gurbanguli Berdimuhamedov Shavkat Mirziyoyevga turkman xalqi alohida qadrlaydigan alabay zotli kuchuk sovg‘a qilgandi.
Izoh (0)