Қашқадарё вилояти Шаҳрисабз туманида 7 ноябрь куни бошқарувни йўқотган автобус йўл-транспорт ҳодисасига учради. Бу ҳақда вилоят Ички ишлар бошқармаси хабар қилди.
Қайд этилишича, ҳолат шу куни соат 09:45 лар чамасида 4К-307 Шаҳрисабз—Мираки автомобиль йўлининг 1-километрида содир бўлган. Шаҳрисабз тумани йўналишидан ҳаракатланиб келаётган Isuzu автобуси ҳайдовчиси Н.А. рул бошқарувини йўқотиб ағдарилиб кетган.
ЙТҲ оқибатида ҳеч ким тан жароҳати олмаган.
Мазкур ҳолат юзасидан суриштирув ҳаракатлари олиб борилмоқда.
«Барча ҳайдовчилардан йўл ҳаракати қоидаларига риоя қилиб тезлик меъёрларига қатий амал қилишларини сўраймиз», — дейилади хабарда.
Қашқадарё вилояти Транспорт бошқармаси мазкур воқеа бўйича қуйидагиларни қўшимча қилди.
Давлат рақами 70 N 201 FA бўлган Isuzu автобуси юридик жиҳатдан «Кеш-тур транс» МЧЖга қарашли бўлиб, Шаҳрисабз шаҳридан Шаҳрисабз туманининг Қутчи қишлоғига доимий йўловчи ташиган. Ушбу транспорт воситасининг йўловчи ташиш ҳуқуқини берувчи лицензия варақаси мавжуд.
Маълум бўлишича, йўл-транспорт ҳодисаси вақтида автобус салонида 10 дан ортиқ йўловчи бўлган, уларга жиддий зарар етмаган.
Ҳолат бўйича ҳуқуқ-тартибот органлари томонидан суриштирув ишлари олиб борилмоқда.
Изоҳ (0)