Farg‘onada 300 gektar maydonda 40 ming aholiga mo‘ljallangan O‘zbekistondagi ilk ekoshahar barpo etilmoqda. Bu haqda “Daryo” muxbiri Azizjon Ermatov xabar bermoqda.
Qayd etilishicha, viloyat hokimi Xayrullo Bozorov Farg‘ona shahrida barpo etilayotgan ekoshaharda – “Yangi O‘zbekiston” massivida olib borilayotgan qurilish ishlari bilan tanishgan.
Ekoshaharda bugungi kunda 69 ta ko‘p qavatli turar-joy qad rostlamoqda. Shuningdek, ikkita maktab, ikkita maktabgacha ta’lim muassasasi, bitta shifoxona, to‘rt ming o‘rinli amfiteatr qurilishi davom etmoqda.
Janubiy Koreya tajribasi asosida barpo etilayotgan ekoshahar hududida 7, 9, 12, 25 qavatli 298 ta ko‘p qavatli uy qurilishi rejalashtirilgan. Shundan 80 tasi bu yil tadbirkorlar tomonidan barpo etiladi.
Shuningdek, ikkita umumta’lim maktabi, uchta maktabgacha ta’lim tashkiloti, tibbiyot muassasalari, savdo va maishiy xizmat shoxobchalari, sport majmuasi va masjid quriladi. 50 gektarda tashkil etiladigan kichik sanoat zonasi aholini ish bilan ta’minlashda muhim o‘rin tutadi.
Mavze o‘rtasidagi 70 gektar maydonda “Yangi O‘zbekiston bog‘i” va sun’iy ko‘l tashkil etiladi. Bog‘ hududida jami 21 ming tup daraxt ekilishi rejalashtirilgan. Hozirdanoq 10 ming tupdan ziyod daraxt ko‘chatlari o‘tqazilgan.
Eslatib o‘tamiz, Farg‘onada 300 gektar maydonda ekoshahar barpo etilishi haqida 2021-yilning avgustida ma’lum qilingandi.
Izoh (0)