So‘nggi oylarda AQSH milliy xavfsizlik bo‘yicha maslahatchisi Jeyk Sallivan Rossiya prezidentining yordamchisi Yuriy Ushakov va Rossiya Xavfsizlik kengashi kotibi Nikolay Patrushev bilan bir necha marta maxfiy muzokaralar o‘tkazgan. Bu haqda The Wall Street Journal nashri AQSH rasmiylari va ularning ittifoqchilari orasidagi manbalariga asoslanib xabar bermoqda.
Gazeta suhbatdoshlariga ko‘ra, bu muloqotlardan maqsad Ukrainadagi urushni bartaraf etish emas, balki keskinlashuvning oldini olish va mamlakatlar o‘rtasidagi aloqa kanallarini qo‘llab-quvvatlash bo‘lgan. Nashrning qo‘shimcha qilishicha, suhbatlar Moskvani yadro quroli yoki boshqa ommaviy qirg‘in qurollaridan foydalanmaslik haqida ogohlantirish maqsadida ham o‘tkazilgan.
The Wall Street Journal manbalari Sallivanning Ushakov va Patrushev bilan qachon va qanchalik tez-tez muloqot o‘tkazgani haqida aniq ma’lumot bermadi.
Bundan tashqari, nashrning yozishicha, Sallivan Ukraina rahbariyatini Rossiya bilan muzokaralarga tayyorligini oshkora e’lon qilishga chaqirgan. Avvalroq The Washington Post gazetasi ham AQSH prezidentining ma’muriyati Kiyevga shunday so‘rov yuborgani haqida xabar bergandi.
Sallivanning matbuot kotibi WSJ ma’lumotlariga izoh bermadi. Oq uyning oxirgi paytlardagi bayonotlarida AQSH prezidenti maslahatchisi Rossiya rasmiylari bilan muzokaralar olib borgani haqida gap yo‘q. Kreml ham so‘rovga javob bermadi.
AQSHning bir qator rasmiylari Sallivan AQSH ma’muriyati a’zolari ichida Rossiya bilan aloqalarni qo‘llab-quvvatlash bo‘yicha tanilganini aytsa, boshqa yuqori martabali siyosatchilar Moskva bilan hozirgi diplomatik va harbiy sharoitlarda muzokaralar samarali bo‘lmaydi, deb hisoblamoqda.
Eslatib o‘tamiz, norasmiy muzokaralar Moskva va Vashington o‘rtasidagi diplomatik munosabatlarning yomonlashuvi, shuningdek, Rossiya prezidenti Vladimir Putinning yadro qurolidan foydalanish haqidagi muntazam tahdidlari fonida bo‘lib o‘tgan.
Izoh (0)