Сўнгги ойларда АҚШ миллий хавфсизлик бўйича маслаҳатчиси Жейк Салливан Россия президентининг ёрдамчиси Юрий Ушаков ва Россия Хавфсизлик кенгаши котиби Николай Патрушев билан бир неча марта махфий музокаралар ўтказган. Бу ҳақда The Wall Street Journal нашри АҚШ расмийлари ва уларнинг иттифоқчилари орасидаги манбаларига асосланиб хабар бермоқда.
Газета суҳбатдошларига кўра, бу мулоқотлардан мақсад Украинадаги урушни бартараф этиш эмас, балки кескинлашувнинг олдини олиш ва мамлакатлар ўртасидаги алоқа каналларини қўллаб-қувватлаш бўлган. Нашрнинг қўшимча қилишича, суҳбатлар Москвани ядро қуроли ёки бошқа оммавий қирғин қуролларидан фойдаланмаслик ҳақида огоҳлантириш мақсадида ҳам ўтказилган.
The Wall Street Journal манбалари Салливаннинг Ушаков ва Патрушев билан қачон ва қанчалик тез-тез мулоқот ўтказгани ҳақида аниқ маълумот бермади.
Бундан ташқари, нашрнинг ёзишича, Салливан Украина раҳбариятини Россия билан музокараларга тайёрлигини ошкора эълон қилишга чақирган. Аввалроқ The Washington Post газетаси ҳам АҚШ президентининг маъмурияти Киевга шундай сўров юборгани ҳақида хабар берганди.
Салливаннинг матбуот котиби WSJ маълумотларига изоҳ бермади. Оқ уйнинг охирги пайтлардаги баёнотларида АҚШ президенти маслаҳатчиси Россия расмийлари билан музокаралар олиб боргани ҳақида гап йўқ. Кремль ҳам сўровга жавоб бермади.
АҚШнинг бир қатор расмийлари Салливан АҚШ маъмурияти аъзолари ичида Россия билан алоқаларни қўллаб-қувватлаш бўйича танилганини айтса, бошқа юқори мартабали сиёсатчилар Москва билан ҳозирги дипломатик ва ҳарбий шароитларда музокаралар самарали бўлмайди, деб ҳисобламоқда.
Эслатиб ўтамиз, норасмий музокаралар Москва ва Вашингтон ўртасидаги дипломатик муносабатларнинг ёмонлашуви, шунингдек, Россия президенти Владимир Путиннинг ядро қуролидан фойдаланиш ҳақидаги мунтазам таҳдидлари фонида бўлиб ўтган.
Изоҳ (0)