Twitter’ning yangi versiyasida 7,99 dollarga verifikatsiya belgisini sotib olish funksiyasi paydo bo‘ldi

iOS uchun Twitter dasturining yangilangan versiyasida ko‘k verifikatsiya belgisini sotib olish imkoniyati haqida ma’lumot paydo bo‘ldi.

Yangilangan versiya tavsifida aytilishicha, oyiga 7,99 dollar evaziga premium Twitter Blue obunasini (hozir 4,99 dollar) sotib olgan istalgan foydalanuvchi “xuddi mashhur odamlar, kompaniya va siyosatchilar kabi” verifikatsiya belgisiga ega bo‘lishi mumkin.

Tavsifda aytilishicha, funksiya AQSH, Kanada, Avstraliya, Yangi Zelandiya va Buyuk Britaniyadagi foydalanuvchilar uchun mavjud.

Ammo hozircha bu funksiyani ishlatish imkoni bo‘lmagan. The Verge nashriga ko‘ra, yangi versiyani yuklab olgan ba’zi foydalanuvchilar dastlab dasturning yangilangan oynasida “verifikatsiya qilingan foydalanuvchilar” bildirishnomasini ko‘rgan, biroq keyinchalik u yo‘qolgan.

Twitter’ning mahsulot bo‘yicha direktori Ester Krouford ta’kidlashicha, Twitter Blue’ning yangilangan versiyasi hali ishga tushirilmagan, biroq ba’zi foydalanuvchilar kompaniyaning yangilanishlarni amalga oshirish jarayonini ko‘rib turadi. “Chunki biz real vaqtda o‘zgarishlarni sinab ko‘rmoqdamiz va amalga oshirmoqdamiz”, — dedi u.

Mashhur shaxslar va kompaniyalar akkauntlarining haqiqiyligini tasdiqlovchi (va ularni feyk yoki parodiya akkauntlaridan ajratib turuvchi) verifikatsiya belgisi uchun to‘lov joriy etilishi kompaniyani sotib olgan Ilon Maskning Twitter’dagi dastlabki qadamlaridan biri bo‘ldi. Bu g‘oya tanqidlarga sabab bo‘ldi, jumladan, foydalanuvchilar ba’zilar ushbu funksiyadan feyk akkauntlar yaratish uchun foydalanishi mumkinligidan xavotir bildirmoqda.