Twitter’нинг янги версиясида 7,99 долларга верификация белгисини сотиб олиш функцияси пайдо бўлди

iOS учун Twitter дастурининг янгиланган версиясида кўк верификация белгисини сотиб олиш имконияти ҳақида маълумот пайдо бўлди.

Янгиланган версия тавсифида айтилишича, ойига 7,99 доллар эвазига премиум Twitter Blue обунасини (ҳозир 4,99 доллар) сотиб олган исталган фойдаланувчи «худди машҳур одамлар, компания ва сиёсатчилар каби» верификация белгисига эга бўлиши мумкин.

Тавсифда айтилишича, функция АҚШ, Канада, Австралия, Янги Зеландия ва Буюк Британиядаги фойдаланувчилар учун мавжуд.

Аммо ҳозирча бу функцияни ишлатиш имкони бўлмаган. The Verge нашрига кўра, янги версияни юклаб олган баъзи фойдаланувчилар дастлаб дастурнинг янгиланган ойнасида «верификация қилинган фойдаланувчилар» билдиришномасини кўрган, бироқ кейинчалик у йўқолган.

Twitter’нинг маҳсулот бўйича директори Эстер Кроуфорд таъкидлашича, Twitter Blue’нинг янгиланган версияси ҳали ишга туширилмаган, бироқ баъзи фойдаланувчилар компаниянинг янгиланишларни амалга ошириш жараёнини кўриб туради. «Чунки биз реал вақтда ўзгаришларни синаб кўрмоқдамиз ва амалга оширмоқдамиз», — деди у.

Машҳур шахслар ва компаниялар аккаунтларининг ҳақиқийлигини тасдиқловчи (ва уларни фейк ёки пародия аккаунтларидан ажратиб турувчи) верификация белгиси учун тўлов жорий этилиши компанияни сотиб олган Илон Маскнинг Twitter’даги дастлабки қадамларидан бири бўлди. Бу ғоя танқидларга сабаб бўлди, жумладан, фойдаланувчилар баъзилар ушбу функциядан фейк аккаунтлар яратиш учун фойдаланиши мумкинлигидан хавотир билдирмоқда.