Mahoratli rejissor Zulfiqor Musoqov tomonidan suratga olingan “Osmondagi bolalar” filmi o‘z davrining eng kassabop kartinalaridan biri bo‘lgan. Film tomoshabinlar qalbidan joy olgani uchun ham undagi qahramonlarning bari tomoshabinlar uchun qadrdon bo‘lib qolgan. “Daryo” muxbiri Nargizaxon Murodova filmda Xurshid rolini ijro etgan Davron G‘ulomov bilan bog‘landi. U tasodif sabab kino olamiga kirib kelgani va bugungi oilaviy sharoiti haqida so‘zlab berdi.
“Darsdan qochish uchun kastingga borgandim”
— 1986-yil Toshkent shahrida tug‘ilganman. Bolalikdan sho‘x, o‘yinqaroq yigit edim. Kinoga tushish xayolimga ham kelmagan. Chunki oilamizda san’atkorlar yo‘q. Mirobod tumanidagi 328-maktabga o‘qib yurganimda kinokasting bo‘layotgani haqida eshitib qoldik. Zulfiqor Musoqovning Alfiya ismli yordamchisi unga taklif etgan. Kastingga borsak, darslarga kirmaymiz, degan xayol bilan sinfdoshim bilan kastingga borganmiz. Kastingga 100 dan ortiq bola kelganda ham unda qatnashish niyatimiz bo‘lmagan. Darsga bormay, shu yerda vaqt o‘tkazishni ko‘zlagandik. Kasting topshirayotgan bolalarning ustidan kulib o‘tirganimizda Zulfiqor akaga oldiga chaqirib, rosa tanbeh bergandi. Keyin kastingning ikkinchi bosqichiga o‘tganimni aytishdi. Kinoga taklif etilgunimga qadar film nima haqida ekanligini ham bilmaganman. Keyin bilsam, Zulfiqor aka kasting topshirishga borganimdayoq meni kuzatishni boshlagan ekan.
“Xurshid menga umuman o‘xshamaydi”
— Suratga olish ishlari juda qiziq kechgan. Chunki jamoa haqiqatan ham juda zo‘r edi. Zulfiqor aka jiddiy ko‘ringani bilan hazilkash va quvnoq inson ekanligini o‘shanda bilgandim. Film bolalar uchun bo‘lgani sabab ham istalgancha sho‘xlik qilishimizga ruxsat berardi. Bunday qilish mumkin emas, deganini eshitmaganman. Ssenariyni birinchi marta o‘qib ko‘rganimda buni qilolmasam kerak, deb o‘ylaganman. Chunki bolaligimda juda sho‘x va o‘yinqaroq edim. Xurshidda esa butunlay o‘zgacha xarakter. Ammo Zulfiqor akaning yordami bilan rolga kirishim oson bo‘lgan. Film namoyishiga ko‘p borardim. Bosh kiyimni bostirib, odamlarni kuzatib o‘tirishni yaxshi ko‘rardim. Hatto bir-ikki marta tomoshabinlarning men haqimdagi fikrlarini eshitib, jahlim chiqqan. “Ichida bitta qo‘rqog‘i shu bola ekan-da”, deyishganda o‘rnimdan shart turib “Aka, indamay kinoni ko‘ring”, deganman.
“Qo‘limdagi odam skeleti...”
— Suratga olish jarayonlari bilan bog‘liq juda ko‘p qiziqarli voqealar bo‘lgan. Masalan, filmning ikkinchi qismida Xurshidning ko‘chada odam skeletini ko‘tarib yurish sahnasi bor. Kamera ko‘chaning bir chekkasiga o‘rnatilgan va roldagi kursdoshim bilan mashina yo‘ldan o‘tishimiz kerak edi. Kamerani ko‘rmagan odamlar dakki ham berishgan, ba’zilar ustimdan kulishgan. Boshqa sahnada esa Zulfiqor aka epizod tabiiy chiqishi kerak, deb bizga nos ham chektirgan. Boshqalarni bilmadim-u, o‘sha sahna sabab bir umr bu jirkanch narsani chekmaslikka qaror qilganman. Boshqa rejissorlar qanday bilmadim-u, ammo Zulfiqor akada odamiylik va insonni tushunish bor. Bular yosh, deb bizdan alohida ovqatlanmasdi, suhbatimizga qo‘shilganida ham tezda til topishib ketardi. Shuning uchun noprofessional aktyorlar jamlangan film mashhurlikka erishgandir.
“Film sabab ko‘p muammolar hal bo‘lgan”
— “Osmondagi bolalar” filmidan keyin juda ko‘p rejissorlardan takliflar olganman. Hatto bir filmning kastingiga ham borib kelgandim. Ammo u yerda Zulfiqor akaning jamoasidagi muhitni topolmadim. Vaqtida takliflar juda ko‘p bo‘lgan. Bora-bora kamayib, hozir umuman taklif qilishmaydi. Aktyorlikka qiziqmaganim uchun ham bu sohadan ketishni istamadim. Ammo odamlar haligacha rolimni eslashlaridan quvonaman. Film sabab juda ko‘p joyda muammomni osongina hal qilganman. Chunki “Osmondagi bolalar”ning muxlislari juda ko‘p.
Davron G‘ulomov yuzidagi chandiqlar nima sababdan paydo bo‘lgani haqida ham ochiqladi.
— 2009-yil kechasi harakatlanayotganda avtofalokatga uchradim. Jiddiy jarohat olganman, bir o‘limdan qolganman, desam ham bo‘ladi. Ancha vaqt ishlamay davolanishimga to‘g‘ri keldi. Falokat oyoq ostida deganlari shu ekan, o‘sha paytda nima bo‘lganini ham anglolmay qoldim. Peshonam va qovog‘im ustidagi chandiqlar undan esdalik bo‘lib qoldi, — deydi Davron G‘ulomov.
“Tadbirkorlik bilan shug‘ullanaman”
— Aktyor bo‘lmaganimdan hech qachon afsuslanmayman. “Osmondagi bolalar” filmi bolaligim bilan bog‘liq shirin xotira bo‘lib qoldi. Bolalik deganda ko‘z oldimga film bilan bog‘liq voqealar keladi. Ishonamanki, undagi ishtirokimdan farzandlarim ham, nabiralarim ham faxrlanib yurishadi. Ayni kunlarda metall savdosi bilan shug‘ullanaman. Faoliyatimning bir qismi tadbirkorlik bilan bog‘liq. Shukrki, oilaliman. Ota-onam va opam birga yashardik. Undan keyin Umida ismli qizga uylandim. Hozirda Latofat va E’zoza ismli shiringina qizaloqlarim bor.
Mavzuga doir:
- Farzandsiz Xurshid, Baxtiyorga turmushga chiqqan Lola va uch egizagi chempion bo‘lgan Javohir. “Osmondagi bolalar-3” filmining suratga olish jarayonidan reportaj (video)
- “Osmondagi bolalar” 20 yoshda: Film qanday suratga olingan? Bosh qahramonlar bugungi kunda nima ish bilan band? (foto)
- “Osmondagi bolalar”dagi Xurshid nima sababdan kinolarda boshqa suratga tushmaganiga oydinlik kiritdi (video)
- “Osmondagi bolalar”da “Emmanuel” filmini tomosha qilish jarayoni qanday suratga olingan? (video)
Izoh (0)