“Hozir mamlakatim ham Ukrainani, ham o‘zini barbod qilmoqda” — Zemfira Londondagi konsertida urushga qarshi chiqish qildi (video)

Rossiyalik xonanda Zemfira Ramazonova 3-noyabr Londondagi Albert Xollda konsert berdi. Bu uning “Borderline” albomini qo‘llab-quvvatlash uchun o‘tkazilgan Yevropa gastrolidagi yakuniy konserti bo‘ldi. Yevropadagi konsertlarida “Otmang” (“Ne strelyayte”) qo‘shig‘ini ijro etish oldidan xonanda har doim Ukrainadagi urushga qarshi chiqish qiladi. Londondagi konsert ham bundan mustasno bo‘lmadi.

Men Ukrainani qo‘llab-quvvatlashimni bildirib o‘tmoqchiman. Bilaman, endi hech qachon Ukrainada qo‘shiq kuylamayman. Lekin o‘sha konsertlarni: Xarkovdagi, Dnepr, Kiyev, Donetsk va mening sevimli Odessamdagi konsertlarni juda yaxshi eslayman. Ularni juda yaxshi eslayman. Va, albatta, buni (xotiralarni) mendan hech kim tortib olmaydi, u abadiy men bilan. Lekin shu bilan birga Rossiyaga juda achinaman. Men Rossiyani juda yaxshi ko‘raman.

Ammo hozir urush davom etmoqda. Mutlaqo ma’nosiz, shafqatsiz (urush). Hozir mening mamlakatim ham Ukrainani ham o‘zini barbod qilmoqda. Chin dildan tinchlikni xohlayman. Urushga yo‘q! — deya nutqini yakunladi rossiyalik xonanda.

Zemfira Ramazonova 9-oktabr kuni Kipr janubidagi Limasol shahrida bergan konsertida Ukrainadagi urush haqida birinchi marta ochiq gapirgan edi. “Har kuni urush tugasin, mamlakatim bu urushni to‘xtatsin, deb ibodat qilaman”, — dedi xonanda va “Otmang” qo‘shig‘ini kuyladi.

24 fevral — Rossiya Ukrainaga bostirib kirgan kuni Zemfira besh yil ichida birinchi yakkaxon konserti bilan Moskvada chiqish qilgan edi. Unda to‘g‘ridan to‘g‘ri urushga qarshi bayonotlar yangramagan, lekin o‘sha kuni ijrochining saytida va ijtimoiy tarmoqlarida “Urushga yo‘q” yozuvi paydo bo‘lgan. Xonanda 26-fevral kuni Moskvada navbatdagi konsert dasturini taqdim etdi. Shundan so‘ng, Zemfira Rossiyani tark etib, Parijga ko‘chib o‘tgani ma’lum bo‘ldi.

Mart oyida Zemfira “Otmang” qo‘shig‘iga Ukrainadagi jangovar harakatlar aks etgan klip e’lon qildi, may oyida u urushga ishora qiluvchi yangi “Go‘sht” qo‘shig‘ini taqdim etdi. Yevropa gastroli boshlanishidan oldin “Lukadan Zemfira” mini-albomi chiqarildi, uning matnlarida urushga ishoralar bor.