Маҳоратли режиссёр Зулфиқор Мусоқов томонидан суратга олинган «Осмондаги болалар» фильми ўз даврининг энг кассабоп картиналаридан бири бўлган. Фильм томошабинлар қалбидан жой олгани учун ҳам ундаги қаҳрамонларнинг бари томошабинлар учун қадрдон бўлиб қолган. «Дарё» мухбири Наргизахон Муродова фильмда Хуршид ролини ижро этган Даврон Ғуломов билан боғланди. У тасодиф сабаб кино оламига кириб келгани ва бугунги оилавий шароити ҳақида сўзлаб берди.
«Дарсдан қочиш учун кастингга боргандим»
— 1986 йил Тошкент шаҳрида туғилганман. Болаликдан шўх, ўйинқароқ йигит эдим. Кинога тушиш хаёлимга ҳам келмаган. Чунки оиламизда санъаткорлар йўқ. Миробод туманидаги 328-мактабга ўқиб юрганимда кинокастинг бўлаётгани ҳақида эшитиб қолдик. Зулфиқор Мусоқовнинг Алфия исмли ёрдамчиси унга таклиф этган. Кастингга борсак, дарсларга кирмаймиз, деган хаёл билан синфдошим билан кастингга борганмиз. Кастингга 100 дан ортиқ бола келганда ҳам унда қатнашиш ниятимиз бўлмаган. Дарсга бормай, шу ерда вақт ўтказишни кўзлагандик. Кастинг топшираётган болаларнинг устидан кулиб ўтирганимизда Зулфиқор акага олдига чақириб, роса танбеҳ берганди. Кейин кастингнинг иккинчи босқичига ўтганимни айтишди. Кинога таклиф этилгунимга қадар фильм нима ҳақида эканлигини ҳам билмаганман. Кейин билсам, Зулфиқор ака кастинг топширишга борганимдаёқ мени кузатишни бошлаган экан.
«Хуршид менга умуман ўхшамайди»
— Суратга олиш ишлари жуда қизиқ кечган. Чунки жамоа ҳақиқатан ҳам жуда зўр эди. Зулфиқор ака жиддий кўрингани билан ҳазилкаш ва қувноқ инсон эканлигини ўшанда билгандим. Фильм болалар учун бўлгани сабаб ҳам исталганча шўхлик қилишимизга рухсат берарди. Бундай қилиш мумкин эмас, деганини эшитмаганман. Сценарийни биринчи марта ўқиб кўрганимда буни қилолмасам керак, деб ўйлаганман. Чунки болалигимда жуда шўх ва ўйинқароқ эдим. Хуршидда эса бутунлай ўзгача характер. Аммо Зулфиқор аканинг ёрдами билан ролга киришим осон бўлган. Фильм намойишига кўп борардим. Бош кийимни бостириб, одамларни кузатиб ўтиришни яхши кўрардим. Ҳатто бир-икки марта томошабинларнинг мен ҳақимдаги фикрларини эшитиб, жаҳлим чиққан. «Ичида битта қўрқоғи шу бола экан-да», дейишганда ўрнимдан шарт туриб «Ака, индамай кинони кўринг», деганман.
«Қўлимдаги одам скелети...»
— Суратга олиш жараёнлари билан боғлиқ жуда кўп қизиқарли воқеалар бўлган. Масалан, фильмнинг иккинчи қисмида Хуршиднинг кўчада одам скелетини кўтариб юриш саҳнаси бор. Камера кўчанинг бир чеккасига ўрнатилган ва ролдаги курсдошим билан машина йўлдан ўтишимиз керак эди. Камерани кўрмаган одамлар дакки ҳам беришган, баъзилар устимдан кулишган. Бошқа саҳнада эса Зулфиқор ака эпизод табиий чиқиши керак, деб бизга нос ҳам чектирган. Бошқаларни билмадим-у, ўша саҳна сабаб бир умр бу жирканч нарсани чекмасликка қарор қилганман. Бошқа режиссёрлар қандай билмадим-у, аммо Зулфиқор акада одамийлик ва инсонни тушуниш бор. Булар ёш, деб биздан алоҳида овқатланмасди, суҳбатимизга қўшилганида ҳам тезда тил топишиб кетарди. Шунинг учун нопрофессионал актёрлар жамланган фильм машҳурликка эришгандир.
«Фильм сабаб кўп муаммолар ҳал бўлган»
— «Осмондаги болалар» фильмидан кейин жуда кўп режиссёрлардан таклифлар олганман. Ҳатто бир фильмнинг кастингига ҳам бориб келгандим. Аммо у ерда Зулфиқор аканинг жамоасидаги муҳитни тополмадим. Вақтида таклифлар жуда кўп бўлган. Бора-бора камайиб, ҳозир умуман таклиф қилишмайди. Актёрликка қизиқмаганим учун ҳам бу соҳадан кетишни истамадим. Аммо одамлар ҳалигача ролимни эслашларидан қувонаман. Фильм сабаб жуда кўп жойда муаммомни осонгина ҳал қилганман. Чунки «Осмондаги болалар»нинг мухлислари жуда кўп.
Даврон Ғуломов юзидаги чандиқлар нима сабабдан пайдо бўлгани ҳақида ҳам очиқлади.
— 2009 йил кечаси ҳаракатланаётганда автофалокатга учрадим. Жиддий жароҳат олганман, бир ўлимдан қолганман, десам ҳам бўлади. Анча вақт ишламай даволанишимга тўғри келди. Фалокат оёқ остида деганлари шу экан, ўша пайтда нима бўлганини ҳам англолмай қолдим. Пешонам ва қовоғим устидаги чандиқлар ундан эсдалик бўлиб қолди, — дейди Даврон Ғуломов.
«Тадбиркорлик билан шуғулланаман»
— Актёр бўлмаганимдан ҳеч қачон афсусланмайман. «Осмондаги болалар» фильми болалигим билан боғлиқ ширин хотира бўлиб қолди. Болалик деганда кўз олдимга фильм билан боғлиқ воқеалар келади. Ишонаманки, ундаги иштирокимдан фарзандларим ҳам, набираларим ҳам фахрланиб юришади. Айни кунларда металл савдоси билан шуғулланаман. Фаолиятимнинг бир қисми тадбиркорлик билан боғлиқ. Шукрки, оилалиман. Ота-онам ва опам бирга яшардик. Ундан кейин Умида исмли қизга уйландим. Ҳозирда Латофат ва Эъзоза исмли ширингина қизалоқларим бор.
Мавзуга доир:
- Фарзандсиз Хуршид, Бахтиёрга турмушга чиққан Лола ва уч эгизаги чемпион бўлган Жавоҳир. «Осмондаги болалар-3» фильмининг суратга олиш жараёнидан репортаж (видео)
- «Осмондаги болалар» 20 ёшда: Фильм қандай суратга олинган? Бош қаҳрамонлар бугунги кунда нима иш билан банд? (фото)
- «Осмондаги болалар»даги Хуршид нима сабабдан киноларда бошқа суратга тушмаганига ойдинлик киритди (видео)
- «Осмондаги болалар»да «Эммануэль» фильмини томоша қилиш жараёни қандай суратга олинган? (видео)
Изоҳ (0)