Samarqandda fuqarolardan pul talab qilgan, sababsiz ishga chiqmagan va xizmat vaqtida spirtli ichimlik iste’mol qilgan 19 nafar “uchastkavoy” tizimdan haydalgan

Samarqand viloyatida 19 nafar profilaktika inspektori Ichki ishlar tizimidan haydaldi. Bu haqda viloyat IIB boshlig‘i Rahmat Mamatov ishtirokidagi yig‘ilishda ma’lum qilingan.

Ma’lum bo‘lishicha, viloyat IIB boshlig‘i boshqarmaning jamoat xavfsizligi xodimlari bilan viloyatda jamoat xavfsizligini ta’minlash, huquqbuzarliklarning oldini olish masalasida, shuningdek xizmat intizomi va qonunchilikka rioya etilishi borasida tanqidiy yig‘ilish o‘tkazgan.

Mazkur holat bo‘yicha “Daryo”ga qo‘shimcha axborot bergan viloyat IIB axborot xizmati rahbari Jahongir Sagdullayevning aytishicha, tizimdan bo‘shatilgan 19 nafar xodim fuqarolardan pul talab qilgani, sababsiz ishga chiqmagani va xizmat vaqtida spirtli ichimlik iste’mol qilgani uchun jazolangan.

Tozalash ishlari davom etyapti. Boshqarma boshlig‘i ishtirokidagi yig‘ilishda o‘tirgan xodimlar ham ota-onalari oldida oxirgi marta ogohlantirildi. Yana xatoga yo‘l qo‘yishsa, ular ham ishdan ketadi, — deydi Jahongir Sagdullayev.

Har bir profilaktika inspektoriga xizmat hududidan xizmat uyi qilib berilgan. Imtiyoz asosida transport xarid qilishiga imkon berilgan. Har kvartalda oylik maoshidan tashqari qo‘shimcha mablag‘ berilyapti. Xo‘sh, bu imkoniyatning nimasi yoqmayaptiki, qonunni buzyapsan? Bu bizni o‘ylantiryapti, — deydi boshqarma boshlig‘i Rahmat Mamatov.

Ichki ishlar xodimi fuqaroning xizmatkori. Biz shu tamoyil asosida ishlashimiz kerak. Biz qachongacha buni qilma, unday dema, xizmat tekshiruv o‘tkazgin deyishimiz kerak? Bundan keyin jazo bo‘lmaydi. U tizimdan ketadi, — degan boshqarma boshlig‘i.

Rahmat Mamatov shuningdek, fuqaro IIB xodimiga tuhmat qilgani uchun jazolangan paytda, nega IIB xodimi fuqaroga tuhmat qilgani uchun, xatti-harakati uchun javob bermasligi kerakligiga e’tibor qaratgan.

Qonun hamma uchun teng bo‘lishi kerakmi?, — degan Rahmat Mamatov.